लमेलाको अन्तिम मिनेट गोलमा सेभिया विजयी

काठमाडौं। स्पेनिश ला-लिगाको सन् २०२१/२२ सिजनअन्तर्गत सेभियाले गेटाफेलाई १-० गोलले पराजित गरेको छ।

गेटाफेको घरेलु मैदानमा सोमवार राति खेलिएको खेलमा बलियो पाहुना टोली सेभियाले बल पोसेसनमा हैकम जमाएको थियो। करिब ६९ प्रतिशत बल आफ्नो कब्जामा राखेको सेभियाले पहिलो हाफमा गोल गर्न भने असफल रह्यो।

उता खेलमा कुल १२ शट प्रहार गरेको घरेलु टोली गेटाफेले पनि निर्धारित ९० मिनेटको समयसम्म कुनै गोल गर्न सकेको थिएन। तर खेलको इन्जुरी समयमा पाहुना टोलीले निर्णायक गोल गर्न सफल भयो।

दोस्रो हाफमा मैदान छिरेका टोटनह्याम हटस्परका पूर्व खेलाडी एरिक लमेलाले ९३औं मिनेटमा सेभियाका लागि विजयी गोल गरेका थिए। यस जितसँगै सेभियाले ला-लिगाको नयाँ सिजनमा लगातार दोस्रो जित निकाल्दै शीर्ष स्थानमा रहन सफल भएको छ।