झुक्किनु होला है, आयो ५०० को यस्तो नोट

काठमाडौं । नेपाल राष्ट्र बैंकले आजबाट रु ५ सयको नयाँ नोट चलनचल्तीमा ल्याएको छ । नेपाल राष्ट्र बैंक मुद्रा व्यवस्थापन विभागले सूचना जारी गर्दै २०७५ वैशाख १२ गतेबाट रु ५ सयको नयाँ नोट चलनलल्तीमा ल्याएको जनाएको हो । साविककै आकार तथा रङमा आउने नयाँ नोटमा साविकको २ वटा पाटे बाघको साटो एउटामात्रै पाटे बाघको चित्र हुनेछ । साथै बैंकले यसअघि चलन चल्तीमा रहेका नोटहरुपनि यथावत राखेको जनाएको छ । 

जसको संकेत नं ङ–४६०००००१ देखि छ–४०९९९९९९सम्म रहने छ । त्यस्तै नोटको अग्रभागमा वाँयातर्फ सगरमाथा हिमालको चित्र रहेको, दायाँतर्फ लालीगुराँसको पानी छाप रहेको र तल्लो भागमा गर्भनर चिरंजीवि नेपालको दस्तखत रहेको हुने मुद्रा व्यवस्थापन विभागले जनाएको छ । उक्त नोटको तल्लो भागको बोर्डरमा सिरिज नम्बर नेपालीमा विसं २०७३ लेखिएको हुनेछ ।