मतदान अधिकृत गायब भएपछि नेतृत्व चयन प्रक्रिया रोकियो

बझाङ । नेपाली कांग्रेसको जिल्ला अधिवेशन गर्न खटाइएका प्रमुख मतदान अधिकृत गायब भएपछि नेतृत्व चयन स्थगन भएको छ । जिल्ला अधिवेशनका लागि केन्द्रीय निर्वाचन समितिले खटाएका प्रमुख मतदान अधिकृत चेतराज भट्ट शनिवार रातिदेखि पार्टीको सम्पर्कमा नरहेका नेताहरुले बताएका छन् ।

जिल्ला अधिवेशनमा नयाँ नेतृत्वका लागि दुई समूहको प्रतिस्पर्धा चलिरहेका बेला नेतृत्व चयन प्रक्रिया स्थगन भएको हो । पूर्वमन्त्री सुरेश मल्ल, अर्जुनजङ्गबहादुर सिंह, पूर्वजिल्ला सभापति सत्यराज भण्डारी र संविधानसभा सदस्य चन्द्रा जोशीको पक्षबाट खडक बोहरा सभापतिका उमेदवार छन् । अर्को समूहबाट रमेश भण्डारी सभापतिका दाबेदार छन् । भण्डारीलाई पूर्वराज्य मन्त्री नरेशबहादुर सिंह तथा जिल्ला सभापति पृथ्वी सिंहको समर्थन छ ।

चुनावी प्रतिस्पर्धामा आफूले समर्थन गरेको उम्मेद्वारले हार्ने देखिएपछि नरेशबहादुर सिंह तथा पृथ्वीबहादुर सिंह समर्थनका नेता कार्यकर्ताले मतदान अधिकृतलाई जिल्ला छोड्न बाध्य पारेको अर्को पक्षको आरोप छ ।

तर सो आरोपमा कुनै सत्यता नभएको, उल्टै मतदान अधिकृत भट्टले भौतिक आक्रमणको धम्की आएको भन्दै गुनासो गरेको नेता नरेशबहादुर सिंहले बताए । प्रमुख मतदान अधिकृत भट्टलाई पृथ्वीबहादुर तथा नरेशबहादुर पक्षबाट शुक्रवार तुरुन्त जिल्ला छोड्नुपर्ने अन्यथा हात खुट्टा भाँच्ने धम्की आएकाले मतदान अधिकृतले जिल्ला छोड्नुपरेको कांग्रेसको अर्को पक्षले आरोप लगाएको छ ।

आरोप निराधार भएको नेता नरेशबहादुरको दाबी छ । प्रमुख मतदान अधिकृत भट्ट सम्पर्कमा छैनन् । उनको मोबाइल स्वीच अफ छ । जिल्ला अधिवेशनका लागि आएका प्रमुख मतदान अधिकृत नै सम्पर्कविहीन भएपछि बझाङको जिल्लास्तरको नेतृत्व चयन गर्न तथा मतदान गर्न सदरमुकाम आएका नेता कार्यकर्ता घर फर्केका छन् । अधिवेशन कहिले हुने भन्ने अनिश्चित भएको छ ।