काठमाडौं– शेरबहादुर देउवा नेतृत्वको सरकारमा सहभागी हुनका लागि नेकपा माओवादी केन्द्रले मन्त्रीहरूको नाम टुंगो लाइसक्दा सत्ता गठबन्धनमा सहभागी अन्य दललाई भने मन्त्री छान्न हम्मेहम्मे परेको छ ।
माओवादीले बुधबार मन्त्री परिषदमा पठाउनका लागि शशि श्रेष्ठ, देवेन्द्र पौडेल, महेश्वर गहतराज र बोधमायाकुमारी यादवलाई छनोट गरेको थियो । माओवादीले मन्त्रीहरूको नाम टुंग्याए पनि सत्ता गठबन्धनका अरु दलहरू कांग्रेस, नेकपा एकीकृत समाजवादी र जनता समाजवादी पार्टी (जसपा)ले भने नाम टुंगो लगाउन सकेका छैनन् ।
माओवादीले नाम टुंगो लगाए पनि अरुले टुंगो नलगाउँदा प्रधानमन्त्री देउवालाई मन्त्रिपरिषद् विस्तार गर्न अप्ठ्यारो परेको छ । देउवा सबै दलले मन्त्रीको लिष्ट दिएपछि मात्रै सरकारलाई पूर्णता दिने पक्षमा छन् ।
सबैभन्दा सकस कांग्रेसमा
मन्त्री छान्न सबैभन्दा बढी समस्या कांग्रेससलाई नै परेको छ । कांग्रेसभित्रको गुट उपगुटका नेताहरूले आ–आफ्ना मान्छेलाई मन्त्री बनाउन खोज्दा मन्त्री छान्न धौधौ परेको हो । कांग्रेसमा प्रधानमन्त्री देउवा, वरिष्ठ नेता रामचन्द्र पौडेल, महामन्त्री डा. शशांक कोइराला, पूर्वमहामन्त्री कृष्णप्रसाद सिटौला प्रकाशमा सिंहलगायतका गुट रहेका छन् ।
प्रधानमन्त्री देउवा सकेसम्म आज बडा दशैँ सुरु भएको शुभदिनमै मन्त्रिपरिषद् विस्तार गर्ने पक्षमा छन् । गुटमार्फत कांग्रेसबाट मन्त्रीको लिस्टमा डा. मिनेन्द्र रिजाल, दिलेन्द्रप्रसाद बडु, तेजुलाल चौधरी, उमाकान्त चौधरी, पुष्पा भुसाल, देवेन्द्रराज कँडेल, अतहर कमाल, डा. राजन केसी, भीमसेनदास प्रधानलगायत रहेका छन् । तर सबैलाई मन्त्रीमा भाग नपुग्ने भएकाले उनीहरूमध्येबाटै छानिनेछन् ।
नेकपा एकीकृत समाजवादीमा पनि उस्तै
एमाले विभाजन भएर बनेको नेकपा एकीकृत समाजवादीले ४ मन्त्री र १ राज्यमन्त्री पाउने सहमति भएको छ । तर उसलाई पनि मन्त्री छान्न सकस भएको छ । देउवालाई प्रधानमन्त्री बनाउन माधव नेपालको ठूलो भूमिका छ । एमाले छोडेर आएका सांसदलाई चित्त बुझाउनुपर्ने भएकाले एकीकृत समाजवादीले पनि औपचारिक रूपमा मन्त्रीको नाम दिएको छैन ।
एकीकृत समाजवादीबाट रामकुमारी झाँक्री, मेटमणि चौधरी, किसान श्रेष्ठ, विरोध खतिवडा, भवानी खापुङ, जीवनराम श्रेष्ठ र प्रेम आले मन्त्री बन्ने सम्भावना छ । एकीकृत समाजवादीले मन्त्री छान्ने जिम्मा अध्यक्षा माधव नेपाललाई दिएकाे छ ।
जसपालाई हम्मेहम्मे
जनता समाजवादी पार्टी (जसपा)ले ४ मन्त्री र १ राज्यमन्त्री पाउनेछ । जसपाबाट मन्त्री हुने लाइनमा महेन्द्र राय यादव, राजेन्द्र श्रेष्ठ, मोहम्मद इस्तियाक राई, रेणु यादव, मृगेन्द्र यादवलगायत रहेका छन् ।
तर यी नामका बारे बढी चर्चा भए पनि औपचारिक रूपमा पनि उसले नाम छनोट गरिसकेको छैन । महन्थ ठाकुरलाई छोडेर जसपामा बसेका धेरै सांसदलाई चित्त बुझाउनुपर्ने बाध्यता जसपालाई रहेको छ ।
सत्ता गठबनधनमा रहेको राष्ट्रिय जनमोर्चाले भने सरकारमा नजाने प्रतिपक्षमै बस्ने बताइसकेकाले उसलाई मन्त्रालय भाग लगाउनुपर्ने छैन ।
सत्ता गठबन्धनका शीर्ष नेताहरूले आजै मन्त्रिपरिषद् विस्तार हुनसक्ने बताए पनि अझै टुंगो भने लागिसकेको छैन ।
यो खबर पढेर तपाईलाई कस्तो महसुस भयो ?
प्रतिक्रिया