जाडोमा भाइरल रुघाखोकीको समस्या बढ्न सक्ने भन्दै चिकित्सकले दिए यस्ता सुझाव

काठमाडौं । जाडो सिजन सुरु भएसँगै भाइरल रुघाखोकीको समस्या बढ्न सक्ने भन्दै चिकित्सकहरुले सचेत गराएका छन् ।

काठमाडौंसहित देशभर चिसोको मौसम सुरु भएसँगै चिकित्सकहरुले भाइरल रुघाखोकीको समस्या बढ्न सक्ने भन्दै त्यसतर्फ सचेत रहन आम नागरिकहरुलाई आग्रह गरेका हुन् ।

मंगलबार सोही विषयमा कुराकानी गर्दै नर्भिक अन्तर्राष्ट्रिय अस्पतालका कन्सलट्यान्ट फिजिसियन डा. आलोक ढुंगेलले चिसो मौसम बढेकोले बालबच्चा, वृद्धवृद्धा, सुत्केरी र दीर्घरोगीहरुले स्वास्थ्य सतर्कता अपनाउन आग्रह गरे । उनले अहिलेको मौसम कोरोनासँगै फ्लूको संक्रमण बढी हुने भएकोले यसले श्वासप्रश्वासमा समस्या आउने बताए ।

कन्सलट्यान्ट फिजिसियन डा. ढुंगेलले चिसोबाट जोगिने, तातो र न्यानो कपडा लगाउने, बाहिर नहिँड्ने, धुवाँ र धुलोबाट बच्ने, मर्निङ वाकमा ननिस्कन आग्रह गरे । त्यस्तै उनले यस्ता फ्लूहरुबाट बच्न रुघाखोकी लागेका मानिसहरुबाट टाढै रहन, मास्कको प्रयोग गर्न, जथाभाबी नाक, कान, मुख नचलाउन पनि आग्रह गरे । उनले यस्ता भाइरसबाट बच्नको लागि झाेलिलो खानेकुरा खान र भ्याक्सिन अनिवार्य लगाउनुपर्ने पनि बताए ।

कन्सलट्यान्ट फिजिसियन डा. ढुंगेलका अनुसार चिसो मौसम बढेकोले गर्दा साना बालबच्चा, वृद्धवृद्धा, सुत्केरी र दीर्घरोगीहरुले एकदमै सतर्कता अपनाउन पर्ने हुन्छ, किन भन्दा अहिले फ्लूको सिजन बढेसँगै कोभिड पनि छ, फ्लूको सिजन पनि बढेको छ, यो सबैमा बालबच्चा, वृद्धवृद्धा, सुत्केरी र दीर्घरोगीहरुलाई अलिकति अफ्ठ्यारो बनाउने गर्छ ।

श्वासप्रश्वासमा समस्या बनाउने हुनाले चिसोबाट जोगिएर तातो, न्यानो कपडा लगाउने, बाहिर नहिँड्ने, धुवाँ, धुलो पनि बिहानको समयमा हुने गरेकोले बिहान मर्निङ वाकमा निस्किन, घरबाहिर निस्किन, त्यति उपयुक्त नहुने खालको देखिन्छ, अर्को कुरा सुत्केरी महिलाहरुले पनि अहिले धुलोधुवाँ, चिसोबाट जोगिनुपर्ने हुन्छ, कपडाहरु न्यानो लगाउनुपर्ने, तातो झोल कुराहरु खानुपर्ने हुन्छ, रुघाखोकी लागेको कोही पनि त्यस्तो मान्छे छ भने उहाँको सम्पर्कबाट विशेष गरी टाढा बस्ने गर्नुपर्दछ, चाहे घर भित्रको कोही सदस्य होस् वा घर बाहिरको होस् रुघाखोकी लागेको मान्छेबाट बस्नुपर्छ ।

जसरी हामीले कोभिडमा गरिरहेका थियौँ, अहिले यो इन्फ्लूएन्जाको फ्लूको लागि गर्ने पनि त्यही नै हो, योसँगै अरु पनि भाइरसहरु डिनो, राइनो भाइरसहरु जसले बच्चाहरुमा धेरै रुघाखोकी गराउँछ, तिनीहरु पनि सक्रिया हुने बेला हो अहिले, त्यसैले सबै उमेर समुदायकाहरुले भाइरसबाट बच्नलाई जरुरी छ, विशेष गरी बालबच्चा, वृद्धवृद्धा, सुत्केरी र दीर्घरोगीहरुले, जस्तै किड्नी, सुगर, मुटुको रोग, बाथको रोग, क्यानसर वा न्यूरोलोजिकल केही समस्या भएका मानिसहरुले विशेष गरी जोगिनु पर्ने हुन्छ र जोगिने अर्को उत्तम उपाय भनेको हामीले भ्याक्सिन पनि लगाउनु पर्ने हुन्छ ।

नोभेम्बरमा २०२२ को लागि नयाँ इन्फ्लूएन्जाको भ्याक्सिन आउँदैछ, अहिलेसम्म सायद बजारमा आइसकेको छैन होला, तर नयाँ फ्लूको भ्याक्सिन आइसकेपछि सबै ६ महिना माथिका मानिसहरुले लाउनै नमिल्ने मेडिकल कन्डिसन छैन भने सबैले अनिवार्य रुपमा फ्लूको भ्याक्सिन लगाउनु होला, त्यसले मौसमी रुघाखोकीबाट पनि जोगिन्छ, पहिला सुरु कसरी जोगिने भन्ने हो ।

जोगिने दुई किसिमको हुन्छ, एउटा भ्याक्सिन लगाएर जोगिने भइयो, अर्को कुरा सामाजिक दूरी कायम गर्ने, मास्क लगाउने, कोभिड–१९ का बेला गरिरहेका आचरणहरुलाई प्रयोगमा ल्याइराख्ने, रुघाखोकी लागिरहेको मानिसको नजिक नजाने, हातले नाक,मुख धेरै नचलाउने, आँखा,कानहरु नचलाउने, न्यानो रहने, झाेलिलाे चिजहरु प्रशस्त पिउने, धुवाँ,धुलो र चिसोबाट बचिराख्ने, यही दुई माध्यमबाट हामी सबै किसिमका रुघाखोकीका भाइरसबाट बच्न सक्छौँ ।

कन्सलट्यान्ट फिजिशियन डा. ढुंगेलले सबै नागरिकहरुले मौसमी रुघाखोकीबाट जोगिने उपायलाई आफ्नो पहिलो प्राथमिकतामा राख्नुपर्ने बताए । उनले कोभिड–१९ का बेला गरिरहेका आचरणहरुलाई प्रयोगमा ल्याइराख्नाले पनि मौसमी भाइरल रुघाखोकीबाट बच्न सकिने बताए । उनले २०२२ को लागि नयाँ इन्फ्लूएन्जाको भ्याक्सिन आउन लागेको बताउँदै कोभिडबिरुद्धको भ्याक्सिनको दुई डोज लगाउनेहरुले इन्फ्लूएन्जाको भ्याक्सिन डाक्टरको सल्लाहबमोजिम लगाउन मिल्ने पनि बताए ।