युट्युबरले प्रेमीकालाई दिए २३ लाख रुपैंयाको नोटको बुके

एक युट्युबरले आफ्नो प्रेमीकाको जन्मदिनको अवसरमा १० लाख पेसो (२३ लाख ६१ हजार रूपैंया) को नोटको बुके उपहारमा दिएका छन् ।

फिलिपिन्सका युट्युब भ्लगर भोन ओर्डोनाले आफ्नो प्रेमिकालाई आश्चर्य चकित पार्न नोटले बनाइएको बुके उपहारमा दिएका हुन् । २० लाख सब्सक्राइबर भएको युट्युब च्यानल चलाइरहेका भोन ओर्डोनाले ५ सय र १ हजार पेसोको नोटको प्रयोग गरेर बुके बनाएका थिए । उक्त बुके ६ फिट अग्लो थियो ।

मेरो प्रेमलाई १० लाख फुलको उपहारले पनि तुलना गर्न सक्दैन भनेर भोनले नोटले बनेको बुके निर्माण गराएका थिए ।

पप गायिका कार्लिन ओकाम्पोसंग लामो समय प्रेम सम्बन्धमा रहेका भोनले पहिलो पटक उनको २७ औं जन्मोत्सव साथै मनाएका हुन् । दक्षिण कोरियामा स्थापना भएको महिला साङ्गीतिक समूह जे–गर्ल ब्यान्डको सदस्य समेत रहेकी कार्लिन अहिले गर्भवती रहेकी छिन् ।