‘सुनकेसरी २’ पनि बन्ने, कस्तो छ फिल्म?

काठमाडौं, ११ जेठ – चलचित्र ‘सुनकेसरी’ आज शुक्रवारदेखि रिलिज भएको छ । थ्रीलर जानरामा निर्माण भएको चलचित्रले ओपनिङ बिजेनस राम्रो गरिरहेको छ ।

चलचित्रले रिलिजको पूर्वसन्ध्यामा ठमेलस्थित छायाँ हलमा प्रिमियर शोको कार्यक्रम पनि राखेको थियो । उक्त प्रिमियर शोमा बोल्दै फिल्मकी निर्मात्री तथा अभिनेत्री ऋचा शर्माले फिल्मको दोस्रो सिक्वेल पनि बनाउने बताइन् ।

प्रिमियर शोमा फिल्म हेरेमध्येका धेरैले फिल्म चित्तबुझ्दो भएको बताएका थिए । थ्रीलर जानरामा निर्माण भएको चलचित्रले अस्ट्रेलियाको एउटा होटलमा हुने कथालाई उठाएको छ । फिल्ममा ऋचा शर्माको मुख्य भूमिका भएपनि अस्ट्रेलियन अभिनेत्री लोरेन र अन्य कलाकारकाे अभिनयकाे पनि तारिफ गरियाे ।

कस्तो छ फिल्म?

संसारभरमा हरर फिल्मको एउटै उद्देश्य हुन्छ – दर्शकको सातो खानु । केही हदसम्म यो फिल्मले दर्शक तर्साउन भूमिका खेल्छ । मेकिङको हिसाबले फिल्म राम्रो छ । कथाका हिसाबले फिल्म औसत छ । आधामै सकाइएको यो फिल्मको कथानक पूरै बुझिन्न ।

फिल्मको आकर्षक पक्ष यसको लोकेसन हो । फिल्म उही घरका अधिकांश स्थानमा दोहोरिँदा पनि लोकेसन झुर लाग्दो बनाउँदैन । कलाकारले अभिनयका हिसाबले राम्रै काम गरेका छन् । फिल्मको ब्याकग्राउन्ड स्कोर पनि ठीकै छ । यद्यपि कहीं कतै स–साना उल्झन भने फिल्ममा छन् । अब डराउँछ कि भन्ने बेलामा फिल्मले डराउन नदिन पनि सक्छ । फरक खुराक खोज्ने दर्शकका लागि यो फिल्म राम्रो विकल्प भने बन्न सक्छ ।