‘छक्का पञ्जा ३’ बा पुष्प खड्काले हात झिके

काठमाडौं । अभिनेता पुष्प खड्काले फिल्म ‘छक्का पञ्जा ३’ नखेल्ने भएका छन् । उनले बताएअनुसार फिल्मबाट उनले हात झिकिसकेका छन् ।

चलचित्रमा आफ्नो भूमिका कस्तो छ भन्ने समेत निर्माण टिमले सस्पेन्स राखिदिएपछि उनले फिल्म नखेल्ने निर्णय गरेको बताए । ‘मैले मेरो भूमिका कस्तो छ भनेर सोधेको हुँ तर उहाँहरुले मेरो भूमिका खुलाउन चाहनुभएन, सिधै देखाउन मिल्दैन बरु नखेल्न सक्नुहुन्छ भन्नुभयो, त्यसैले मैले छोडेको हुँ,’ उनले लोकपथसँगको कुराकानीमा भने, ‘छोटो भएपनि आफ्नो भूमिकालाई बुस्ट गर्नका लागि मैले मेरो भूमिका बुझ्न खोजेको थिएँ ।’

शुरुमा फिल्म आफूले साइन गरेपनि अहिले चित्त नबुझेका कारणले गर्दा फिल्मबाट बाहिरिएको उनले बताए ।

चलचित्र ‘छक्का पञ्जा ३’ मा पुरानो टिमले काम गरिरहेको छ । केही पात्र भने फेरिएका छन् । फिल्ममा पुष्पसँगै दीपिका प्रसाईंको पनि इन्ट्री भएको थियो । दीपाश्री निरौलाले निर्देशन गर्ने यो फिल्म दशैंमा प्रदर्शनको लक्ष्य राखिएको छ ।