काठमाडाैं । चर्चित गीत ‘पियारी’का गायक जोसेफ शाही ठकुरीले नवौँ म्युजिक खबर अवार्ड जितेका छन्।
राजधानीमा आइतबार सम्पन्न भएको ‘नवौं म्युजिक खबर म्यजिक अवार्ड २०२१’ मा उनले सर्वोत्कृष्ट देउडा गायकको अवार्ड हात पारेका हुन्।
म्युजिक खबरको प्रस्तुति एवं शुभकामना मिडिया सोलुशनको आयोजनामा भएको नवौं म्युजिक खबर म्युजिक अवार्डमा वरिष्ठ गीतकार राजेन्द्र थापालाई ‘म्युजिक खबर दीर्घ साधना’ सम्मान प्रदान गरिएको थियो।
संस्कृति, पर्यटन र नागरिक उड्डयन मन्त्री प्रेमबहादुर आलेको प्रमुख आतिथ्यतामा राजधानीको लैनचौरस्थित लैनचौर बैंकटको हलमा भएको उक्त कार्यक्रममा थापालाई ३० हजार ५५५ रुपैयाँ नगद राशिसहित दोसल्ला र सम्मानपत्रद्वारा दीर्घ साधना सम्मान अर्पण गरिएको थियो।
कार्यक्रममा गायिका पूर्णिमा लामा र गायक सरोज कोइराला सर्वोत्कृष्ट गायक गायिका बन्न सफल भएका थिए।
कार्यक्रममा वरिष्ठ गायक रामप्रसाद खनाललाई ‘म्युजिक खबर डायस्पोरा संगीत सम्मान’ प्रदान गरिएको थियो भने लोकप्रिय गायक हेमन्त शर्मा र लोकप्रिय गायिका सीता थापालाई ‘म्युजिक खबर दशकको स्रष्टा सम्मान’ प्रदान गरिएको थियो।
त्यस्तै गायक राजु ढकाललाई ‘म्युजिक खबर युवाप्रतिभा संगीत सम्मान’ प्रदान गरिएको थियो। त्यस्तै, बालगायिका सफलता श्रेष्ठलाई ‘म्युजिक खबर बालप्रतिभा प्रोत्साहन सम्मान’ प्रदान गरिएको थियो।
सोही कार्यक्रममा गायक सुमित खड्कालाई ‘म्युजिक खबर संगीत सम्मान’ प्रदान गरिएको थियो भने कवि तथा गीतकार युवराज अधिकारी र गीतकार अनु शाहलाई ‘म्युजिक खबर स्रष्टा सम्मान’बाट सम्मानित गरिएको थियो ।
त्यस्तै फोटोग्राफर च्याङ्बा लामालाई ‘म्युजिक खबर फोटोग्राफी सम्मान’बाट सम्मान गरिएको थियो।
यो खबर पढेर तपाईलाई कस्तो महसुस भयो ?
प्रतिक्रिया