सकियो ‘मालिका’ को छायांकन, फिल्म कहिले?

काठमाडौं । अभिनेत्री रेखा थापाले निर्माण तथा निर्देशन गरेको फिल्म ‘मालिका’ ले छायांकन सकेको छ । फिल्मको छायांकन २९ दिन लगाएर सकाइएको निर्माण टिमले जनाएको छ ।

यो फिल्ममा रेखा निर्माता र निर्देशकका रुपमा मात्र होइन, कलाकारका रुपमा पनि देखिएकी छिन् । आफू समेत अभिनयमा देखिए पनि फिल्मको कथामा उनलाई भन्दा बढी जाजरकोटकी कमला ओलीलाई प्रस्तुत गरिएको छ । चौध वर्षीय कमलालाई फिल्ममा बाल विवाहको कथामा प्रस्तुत गरिँदैछ ।

यो फिल्मलाई जाजरकोट, काठमाडौं, बनेपा, बाँके लगायतका स्थानमा छायांकन गरिएको थियो । पछिल्लो केही समयदेखि रेखा महिला विशेष फिल्म बनाउने भन्दै लागिपरेकी छिन् ।

तपाईंलाई जानकारी गराऔं कि, यसभन्दा अघि पनि रेखाले नारीलाई सशक्त भूमिकामा प्रस्तुत भएकी थिइन् तर फिल्म भने व्यावसायिक रुपले असफल भएका थिए ।

रेखासँगै नरबहादुर कार्की पनि फिल्ममा निर्माताका रुपमा छन् । जुन कथालाई उनी आफैले जुटाएका हुन् भने शिवम् अधिकारीले फिल्मको स्किृप्ट लेखेका हुन् ।

बाल विवाह र महिला सशक्तीकरणको कथामा निर्माण भइरहेको फिल्म तिहारको अवसर पारेर रिलिज हुने भएको छ ।