मिति : २०७५ जेठ २२
स्थान : बल्खु, काठमाडौँ
दृश्य नं १ : कोल्टे ट्रक
बडेमानको ट्रक गर्लम्म कोल्टेको । ईन्जिनबाट तेल तपतप चुईरहेको । स्थानीय बासिन्दालाई प्रश्न गर्दा उत्तर आयो – “आँखै अगाडि आज बिहान पल्टियो यो ट्रक । बाटो चिप्लो भाको भएर ।”
यो दृश्य त केवल एउटा उदाहरण मात्रै हो ।
निर्माणाधीन कलङ्की–कोटेश्वर चक्रपथको एक पटक परिक्रमा गर्नुभयो भने यस्ता अनगिन्ती समस्यासँग साक्षात्कार गर्न पाउनुहुन्छ तपाईँले । त्यति मात्रै होइन स्थानीय आजित भईसकेका छन् ।
लोकपथ टिम रिपोर्टिङ्ग गर्न बल्खुमा पुग्दा देखिएको कुईरीमण्डल धुलोले सोच्न बाध्य बनायो कि हामी साँच्चै महानगरीमा छौँ कि कुनै मरुभूमिमा (घाम लाग्दा) वा सीमसारमा (पानी पर्दा) ! 
दृश्य नं २ : घरबाट निस्किँदा सफाचट, अफिस पुग्दा जोगीको भेष !
उनी कमला अधिकारी । सानेपाकी स्थायी बासिन्दा । उनको कार्यालय बल्खु चोक । पल्टिएको ट्रक, वरिपरिको वाक्क लाग्ने दृश्य, धुँवा धुलो र ट्राफिक जामलाई क्यामेराले कैद गर्न लाग्दा उनी आईन् र भनिन्,“जागिरका लागि यही बाटो नहिँडी सुख छैन । तर बाटोको हालत यस्तो छ ।”
‘के छन् त समस्या ?’
बिहान सफाचट भएर अफिस जान निस्कियो एकछिन हिँडेपछि धुलोले पुरिएर, फुस्रै । सारै गाह्रो भाछ । यी यसरी गाडी पल्टिन्छ , पानी परेपछि बाटो हिलो भएर । रुघा, खोकी ज्वरो त सामान्य भइसक्यो । बच्चाहरु साह्रै बिरामी हुन्छन् । उनले आफ्नो दुखेसो पोखिन् ।
स्थान : कलंकी
दृश्य नं ३ : व्यवस्थित तरिकाले काम हुनुपर्यो : नागरिक
श्वास समेत राम्ररी फेर्न नसकिने बल्खु पछि हामी लाग्यौँ कलंकी । कलंकीको हालत उस्तै । पुगेर त्यहाँको भद्रगोल नियालिरहँदा एउटा अँधबैँसे पुरुषहरुको ‘ग्रुप’ अलिक आक्रोशित हुँदै गफ गरिरहेका थिए । “फोन नउठाउन्जेल ट्राइ गरिराख्नुपर्छ नि ।” “कति गर्नु त ! पुरै घण्टी जाँदा नि उठाउँदैनन् ।”
कुरा के रहेछ भनी बुझ्नलाई हामीले त्यहाँ मध्येको अलिक टाठोबाठो देखिने मान्छेसँग सोधपुछ गर्यौँ ।
उनको नाम विशाल तामाङ । १८ वर्षदेखि कलङ्कीमा बस्दै आएका ।
उनका अनुसार सडकमा पानी हाल्ने ठेक्का लिएको मान्छेले त उनीहरुको फोन पनि उठाउँदैनन् रे !
बाटो बन्ने नाममा वर्षौदेखि कलंकीबासीले सफा हावामा श्वास लिन पाएका छैनन् ।
उनी भन्छन्– “हो ! बाटो बनाउँदा धुलो उड्नु स्वभाविक हो । हामीलाई विकास कार्यसँग प्रब्लम होइन । तर, दिनमा कम्तीमा ४ पटक पानी हाल्ने भनिसकेपछि आफ्नो काम त गर्नुपर्यो नि ।”
“मन्त्रीहरुलाई गाडीमा झण्डा फर्फराएर हिँड्दै ठिक्क । सास्ती त हामी सर्वसाधारणलाई नै हो ।”
दृश्य नं ४ : धुलो र हिलोले गर्दा अन्ब्यालेन्स्ड हुन्छ गााडी : ट्याक्सी चालक
तामाङको आक्रोश सुनेर हामी लाग्यौँ ट्याक्सी स्ट्यान्डतिर ।
यात्रु पर्खेर बसिरहेका अरुण खनाल पनि निक्कै वर्ष भएछ कलंकी बस्न थालेको । भन्छन् – “आँखामा धुलो पसेर साह्रै गाह्रो हुन्छ, ट्याक्सी चलाउन । हिलोमा झन् गाडी चिप्लेर दुर्घटना हुन्छ भन्ने डर । केही भयो भने ड्राइभरको टाउकामा सबै दोष थुप्रिन्छ ।”
हिजोआज काठमाडौँमा अव्यवस्थित सडकका कारण सवारी दुर्घटना पनि निक्कै बढेको छ ।
दृश्य नं ५ : नाना सबै फोहार हुन्छ : रोमन बस्नेत
रिपोर्टिङ सकेर स्कुटर स्टार्ट गर्दैगर्दा देख्यौँ एकजना बालक आफ्नो स्कुल युनिफर्म टकटकाउँदै थिए । एल केजीमा पढ्ने रोमन बस्नेत । मैले प्रश्न तेर्साएँ ।
कस्तो लाग्छ धुवाँधुलो ?
उत्तरमा बस्नेत भन्छन्, – “धुलो, हिलो मनपर्दैन । नाना फोहोर हुन्छ ।”
हुन पनि सेतो यूनिफर्म र जुत्ता लगाएर स्कुल हिँडेका विद्यार्थीको कपडा र जुत्ताभरि हिलोका छिटा । अनि स्कुलमा यही कारणले कतिपटक शिक्षकको पिटाई पनि खानुपर्ने अवस्था ।
निर्माणाधीन सडकका कारण काठमाडौँबासीले निक्कै सास्ती खेप्नुपरेको छ । काठमाडौँमा बसोबास गर्ने करिब सबैजना आ–आफ्नो तरिकाले यो समस्यासँग प्रत्येक दिन ‘डिल’ गरिरहेका छन् ।
आखिर कहिलेसम्म ? विकासको नाममा जनताको स्वास्थ्यसँग प्रत्यक्ष रुपमा जोडिएका यस्ता विषयमा को जिम्मेवार बन्ने ? यो देशमा ठेकेदारले सरकार चलाउने हो कि सरकारले ठेकेदार ? किन हाम्रा अधिकार यसरी हनन भईरहन्छन् ?
प्रश्न अनगिन्ती छन् । जवाफ छैन ।
सर्वसाधरणहरुको प्रतिक्रिया जस्ताको त्यसतै हेर्न भिडियो हेर्नुहोस् :
यो खबर पढेर तपाईलाई कस्तो महसुस भयो ?
प्रतिक्रिया