मोरङ । १ नम्बर प्रदेश प्रहरी तालिम केन्द्र बिराटनगरमा संचालित प्राविधिक प्रहरी जवान दोस्रो समूहको आधारभूत तालिममा सहभागी ४८ जना प्रहरी जवानहरु दीक्षित भएका छन् ।
१ नम्बर प्रदेश प्रहरी कार्यालय विराटनगरका प्रमुख प्रहरी नायव महानिरीक्षक अरुण कुमार बिसीको प्रमुख आतिथ्यतामा उक्त तालिम केन्द्रमा बिहीबार आयोजित दीक्षान्त समारोहमा उनीहरू दिक्षित भएका हुन् ।
उक्त अवसरमा प्रहरी नायब महानिरीक्षक बिसीले तालिममा सर्वप्रथम हुने प्रशिक्षार्थीलाई प्रमाणपत्र तथा नगद पुरस्कार प्रदान गर्दै प्रहरीजस्तो मर्यादित पेशामा आफ्ना सन्ततिलाई प्रवेश गर्न हौसला प्रदान गर्नुहुने दीक्षित प्रहरीका परिवारजनहरुमा आभार प्रकट गरे।
साथै उनले कार्यक्षेत्रमा मन, वचन र कर्मले निष्ठापूर्वक इमानदार र बफादार भई उच्च मनोवलका साथ नागरिक सेवामा खटिन प्रशिक्षार्थीहरूलाई निर्देशन समेत दिए ।
१ नम्बर प्रदेश प्रहरी तालिम केन्द्र विराटनगरका समादेशक प्रहरी वरिष्ठ उपरीक्षक मीरा चौधरीले प्रशिक्षार्थीहरुलाई सपथ ग्रहण गराउनुका साथै तालिम अवधिमा सिकेका ज्ञान र सीपको कार्यक्षेत्रमा अक्षंरस पालना गरेमा सफलतापूर्वक कार्य सम्पन्न हुने विश्वास व्यक्त गरे ।
समारोहमा तालिम केन्द्रका प्रहरी निरीक्षक सुजाता तुम्बाहाम्फेले तालिमसम्बन्धी प्रतिवेदन प्रस्तुत गर्दै ९० कार्यदिन अवधिको उक्त तालिम गत भदौ २७ गतेदेखि संचालन भएको जानकारी दिए ।
दीक्षान्त समारोहमा प्रहरी वरिष्ठ उपरीक्षकहरु, प्रहरी अधिकृतहरुलगायत प्रहरी कर्मचारीहरूको उपस्थिति रहेको थियो ।
यो खबर पढेर तपाईलाई कस्तो महसुस भयो ?
प्रतिक्रिया