बोरामा भेटियो अभिनेत्री इस्लामको शव, बेपत्ता भएको भनी उजुरी दिएका श्रीमानले नै गरे हत्या स्वीकार

काठमाडौं । केही दिनअघि बेपत्ता भएकी बंगलादेशी अभिनेत्री राइमा इस्लाम शिमु मृत अवस्थामा फेला परेकी छन् । उनको शव ढाकाको केरानीगञ्जस्थित पुल नजिकै बोरामा फेला परेको थियो ।

प्रहरी अनुसन्धानमा सो क्षेत्रका स्थानीयवासीले सोमबार कदमटोली क्षेत्रको अलिपुर पुल नजिकै अभिनेत्रीको शव देखेपछि प्रहरी चौकीमा खबर गरेका थिए ।

शरीरमा चोटका धेरै निशान :

राइमाको निर्ममतापूर्वक हत्या गरिएको छ । अभिनेत्रीको शरीरमा धेरै चोटका निशान छन्।

हत्यापछि आइतबार राईमा इस्लाम शिमुको शव बोरामा बाँधेर पुल नजिकै फालिएको थियो ।

एक शीर्ष प्रहरी अधिकारीले शवलाई पोस्टमार्टमको लागि सर सलिमुल्लाह मेडिकल कलेज अस्पताल (एसएसएमसीएच) पठाइएको र यस विषयमा अनुसन्धान भइरहेको बताए।

श्रीमानले दिएका थिए हराएको उजुरी :

शिमु बेपत्ता भएपछि उनका परिवारका सदस्यले आइतबार कालाबागन प्रहरी चौकीमा उजुरी दिएका थिए ।

प्रहरीले अप्राकृतिक मृत्युको मुद्दा दर्ता गरी अभिनेत्रीका श्रीमान सखावत अलीलाई सोधपुछका लागि नियन्त्रणमा लिएको छ । अलीसँगै उनका चालकलाई पनि नियन्त्रणमा लिइएको छ ।

श्रीमानले गरे हत्या स्वीकार : 

ढाका प्रहरीलाई दिएको आफ्नो आधिकारिक बयानमा अभिनेत्रीको हत्याको कारण पारिवारिक विवाद रहेको बताएका छन् ।

यसै क्रममा अब दिवंगत अभिनेत्रीका श्रीमानले हत्या गरेको स्वीकार गरेका छन् । ढाकाका वरिष्ठ न्यायिक मजिस्ट्रेट रबेया बेगमले मंगलबार शिमुका पति शाखावत अलीम नोबेल र उनीहरूका साथी एसएमवाई अब्दुल्लाह फरहादलाई सोधपुछका लागि हिरासतमा राखेका छन्।

४५ वर्षीया अभिनेत्रीले सन् १९९८ मा फिल्म ‘बर्तमन’ बाट डेब्यु गरेकी थिइन् । त्यसपछि उनले २५ फिल्ममा अभिनय गरिसकेका छन् । उनी बंगलादेश चलचित्र कलाकार संघको सहयोगी सदस्य थिइन्। उनले चलचित्रका अलावा टीभी नाटकमा पनि अभिनय र निर्माण गरेका थिए ।