छ महिनामा ४ अर्ब राजस्व

विराटनगर । आन्तरिक राजस्व कार्यालय विराटनगरले चालु आर्थिक वर्षको छ महिनामा कूल चार अर्ब १६ करोड ६७ लाख ६४ हजार रुपैयाँ राजस्व सङ्कलन गरेको छ । सो अवधिमा कार्यालयले चार अर्ब ३८ करोड ७३ लाख ८७ हजार रुपैयाँ राजस्व सङ्कलन गर्ने लक्ष्य लिएको थियो । लक्ष्यमा २२ करोड छ लाख २२ हजार रुपैयाँ राजस्व कम सङ्कलन भएको हो ।

गएको आवमा सो अवधिमा तीन अर्ब ८८ करोड ९७ लाख ३४ हजार रुपैयाँ राजस्व सङ्कलन गरेको थियो । सो अवधिमा कार्यालयले तीन अर्ब ९१ करोड ५२ लाख ८८ हजार रुपैयाँ राजस्व सङ्कलन गर्ने लक्ष्य लिएको थियो । कार्याललये लक्ष्यभन्दा दुई करोड ५५ लाख ५४ हजार रुपैयाँले कम राजस्व सङ्कलन गरेको थियो ।

कार्यालय गएको वर्षको सो अवधिमा सङ्कलन गरेको राजस्वभन्दा २७ करोड ७० लाख ३० हजार रुपैयाँ राजस्व बढी सङ्कलन गर्न सफल भएको कार्यालयका प्रमुख सूर्यप्रसाद पोखरेलले जानकारी दिए ।

सो अवधिमा गएको वर्षभन्दा सात प्रतिशत बढी राजस्व सङ्कलन भएको उनले बताए । कार्यालयले सङ्कलित गरेको राजस्वमा आयकर एक अर्ब ७० करोड चार लाख ८६ हजार रुपैयाँ, बहाल कर ५० करोड २५ लाख आठ हजार रुपैयाँ, ब्याजकर पाँच करोड ९८ लाख ५० हजार रुपैयाँ, मूल्य अभिवृद्धिकर एक अर्ब पाँच करोड ६२ लाख १९ हजार रुपैयाँ, अन्तःशुल्क एक अर्ब २९ करोड ९५ लाख ७५ हजार रुपैयाँ, स्वास्थ्य सेवा ३० हजार रुपैयाँ र शिक्षा सेवा शुल्क तीन लाख ४६ हजार रुपैयाँ छन् ।

सङ्कलित राजस्वमा करदाता सेवा कार्यालय विराट चोकबाट १८ करोड एक लाख ४४ हजार रुपैयाँ, करदाता सेवा कार्यालय पथरीबाट १० करोड ६० लाख ७७ हजार रुपैयाँ र आन्तरिक राजस्व कार्यालय विराटनगरले तीन अर्ब ८८ करोड पाँच लाख ४३ हजार रुपैयाँ सङ्कलन भएको कार्यालयले जनाएको छ ।