दयाहाङको फिल्म ‘भैरे’ को ट्रेलर रिलिज (भिडियो)

काठमाडौं । चलचित्र ‘भैरे’ को ट्रेलर सार्वजनिक गरिएको छ । काठमाडौंमा आयोजित एक कार्यक्रमको आयोजना गरी ट्रेलर सार्वजनिक गरियो ।

हिमाली भेगमा बस्ने गाउँलेको कथा समेटिएको कथालाई एभरेष्ट सूर्य बोहराले लेखेका हुन् भने फिल्ममा निर्देशन पनि उनकै छ । अमेरिकामा बस्दै आएका निर्देशक बोहराले आफूले देखाउन खोजेको कुरा फिल्ममार्फत प्रस्तुत गर्न खोजेको बताए ।

चलचित्रमा दयाहाङ राई, सुरक्षा पन्त, वर्षा शिवाकोटी, बुद्धि तामाङ, विक्रान्त बस्नेत लगायतका कलाकारको मुख्य भूमिका रहेको छ । ट्रेलरमा वर्षा र बुद्धिको जोडीलाई देखाइएको छ भने दयाहाङ र सुरक्षालाई पनि जोडीका रुपमा देखाइएको छ ।

प्रेम प्रसाद पौडेल र माया अधिकारी मुख्य निर्माता रहेको यो फिल्ममा लेख बहादुर पुनः, गायक यम बराल पनि निर्माताका रुपमा रहेका छन् । ट्रेलर रिलिज कार्यक्रममा बोल्दै गायक बरालले आफूले पहिलेदेखि नै फिल्म निर्माणमा हात हाल्न खोजेकाले फिल्मको निर्माण गरेको बताए ।

साथै चलचित्रमा अनुभव रेग्मी बालकलाकारका रुपमा रहेका छन् भने अर्जुन गुरुङ, जयेन्द्र लामा, सुनील थापा लगायतले पनि अभिनय गरेका छन् ।

चलचित्रमा पुरुषोत्तम प्रधानको छायांकन, विजय बस्यालको मोसन ग्राफिक्स, अनन्त घिमिरेको भीएफएक्स, सूर्य थोकरको द्वन्द्व र वनिष शाहको सम्पादन रहेको छ ।
चलचित्र यही साउन आउँदो साउन ४ गतेदेखि रिलिज हुँदैछ ।