मिस्ट्री गर्लका कारण चर्चामा ऋतिक रोशन, को हुन् त मिस्ट्री गर्ल ?

काठमाडौं । बलिउड अभिनेता ऋतिक रोशनसँग देखिएकी मिस्ट्री गर्लको सर्वत्र चर्चा चलिरहेको छ । सामाजिक सञ्जाल प्रयोगकर्ताहरूले पनि ऋतिक रोशनसँग डेट गरिरहेको को हुन् भनेर प्रश्न गरिरहेका छन् । ऋतिक रोशन र उनकी श्रीमती सुजैनको सम्बन्धविच्छेद भएको आठ वर्ष भइसकेको छ । दुवैले सन् २०१४ मा सम्बन्धविच्छेद गरेका थिए । तर, त्यसपछि पनि ऋतिक र सुजैनसँगै धेरैपटक देखिएका छन् ।

मिस्ट्री गर्ल : 

हालै ऋतिक रोशनको एउटा भिडियो सार्वजनिक भएको छ जसमा उनले एक मिस्ट्री गर्लको हात समातेको देखिन्छ । यी मिस्ट्री गर्ल अभिनेत्री तथा संगीतकार हुनसक्ने अनुमान धेरैले लगाएका छन् । भिडियोमा देख्न सकिन्छ कि ऋतिक मिस्ट्री गर्लसँग रेष्टुरेन्टबाट बाहिर निस्किएर कारमा राख्छन् र आफूपनि कारमा चढ्छन् । ऋतिकले अभिनेत्री सबा आजादसँग डेट गरिरहेको बताइएको छ । तर, यसको आधिकारिक पुष्टि भने भएको छैन न त ऋतिकको तर्फबाट यसबारे कुनै प्रतिक्रिया आएको छ ।

ऋतिक रोशन शुक्रबार साँझ आफ्ना बहिनीहरू पश्मिना र सुनैना रोशनसँग डिनरमा गएका थिए । निस्कने क्रममा उनले एक युवतीको हात समातेको अवस्थामा देखिए । मिस्ट्री गर्लले आफ्नो अनुहारमा कालो मास्क लगाएकी थिइन् । जसपछि मिडियामा यो मिस्ट्री गर्ल अरु कोही नभई सबा भएको खबर आएको थियो । जो पेशाले संगीतकार र गीतकार हुन् । ऋतिक रोशन अहिले तमिल सुपरहिट फिल्म विक्रम वेधाको हिन्दी रिमेकमा काम गरिरहेका छन् । यस फिल्ममा उनीसँगै सैफ अली खान र राधिका आप्टे पनि देखिनेछन् ।