हनी सिंहलाई लाग्यो अश्लील गीत गाएको आरोप, प्रहरी चौकी पुगे हनी सिंह

काठमाडौं । चर्चित र्‍याप गायक हनी सिंह अश्लील गीत गाएको आरोपमा मुछिएका छन्, जसका कारण महाराष्ट्रको नागपुरको जिल्ला अदालतले हनी सिंहलाई आफ्नो आवाजको नमूना पेश गर्न आदेश दिएको छ । यही कारणले हनी सिंह आइतबार नागपुरको प्रहरी चौकी पुगेका थिए । यहाँ हनी सिंहले आफ्नो आवाजको नमूना रेकर्ड गरे। हनी सिंहको आवाज रेकर्ड गर्ने प्रक्रिया करिब चार घण्टासम्म चलेको थियो ।

जिल्ला र अतिरिक्त सत्र न्यायाधीश एसएएसएम अलीले जनवरी २७ मा हनी सिंहलाई फेब्रुअरी ४ र फेब्रुअरी ११ बीचमा नागपुरको पाँचपौली पुलिस स्टेशनमा हाजिर हुन निर्देशन दिएका थिए तर हनी सिंह ढिलो पुलिस स्टेशन पुगेका थिए।

एक अधिकारीका अनुसार आनन्दपाल सिंह जबलले हनी सिंहको गीतमा अश्लीलताको आरोप लगाउँदै प्रहरीमा उजुरी गरेका थिए। प्रहरीले हनी सिंह विरुद्ध भारतीय दण्ड संहिताको धारा २९२ र २९३ र सूचना प्रविधि ऐनको प्रासंगिक प्रावधान अन्तर्गत मुद्दा दर्ता गरेको थियो।

अधिकारीले भने, ‘हनी सिंहले यस मुद्दामा सन् २०१५ मा जमानत पाएका थिए। जिल्ला र अतिरिक्त सत्र न्यायाधीश एसएएसएम अलीले जनवरी २७ मा गायकलाई फेब्रुअरी ४ देखि ११ गतेसम्म नागपुरको पाँचपौली प्रहरी चौकीमा हाजिर हुन निर्देशन दिएका थिए । हनी सिंहको आवाजको नमूना संकलन गर्न भ्रष्टाचार विरोधी ब्यूरोका प्राविधिकलाई बोलाइएको थियो। हनी सिंहको आवाजको रेकर्डिङ कोतवाली प्रहरी चौकीमा गरिएको थियो किनभने हनी सिंहको उपस्थितिको खबर पाएर पाँचपौली थाना वरिपरि प्रशंसकहरूको ठूलो भीड लागेको थियो।’