नेप्से परिसूचक ३.६६ अंकले गिरावट

काठमाडौं । साताको पहिलो कारोबारको दिन आइतबार सेयर बजार मापक नेप्से परिसूचकमा गिरावट आएको छ ।

अघिल्लो साताको बुधबारदेखि ओरालो लागेको नेप्से परिसूचक छैटौँ दिनसम्म पनि निरन्तर रुपमा गिरावट आएको हो ।

आइतबार नेप्से परिसूचक ३.६६ अंक घटेर २ हजार ५४३.३९ बिन्दुमा झरेको छ । नेप्से घटे पनि सेन्सेटिभ इण्डेक्स १.३१ र सेन्सेटिभ फ्लोट इण्डेक्स ०.४७ अंक बढेको छ भने फ्लोट इण्डेक्स ०.०४ अंक घटेको छ ।

आइतबार कारोबारमा आएका २३० कम्पनीको ५१ लाख ३९ हजार कित्ता सेयर २ अर्ब ४९ करोड ३२ लाख ४१ हजार रुपैयाँबराबरको खरिदबिक्री भएको छ । नेप्सेसँगै पछिल्लो समय कारोबार रकममा समेत गिरावट आइरहेको छ ।

नेप्सेका १३ उपसमूहमध्ये ४ उपसमूहको परिसूचक बढेको छ भने बाँकी ९ उपसमूहको परिसूचकमा गिरावट आएको छ । जसमा विकास बैंक उपसमूहको परिसूचक सबैभन्दा बढी १.२४ प्रतिशत बढेको छ ।

अन्य उपसमूहको परिसूचक ०.८५ प्रतिशत, बैंकिङको ०.२ प्रतिशत र होटल उपसमूहको ०.०५ प्रतिशत बढेको छ । तर, उत्पादन तथा प्रशोधन उपसमूहको परिसूचक भने सबैभन्दा बढी १.२४ प्रतिशतले गिरावट आएको छ ।

नेप्से परिसूचकमा गिरावट आए पनि मैलुङ खोला जलविद्युत् कम्पनीको सेयरमूल्य सबैभन्दा बढी ७.८० प्रतिशत बढेको छ ।

त्यस्तै, सामलिङ पावर कम्पनी र नेपाल ल्युब आयलको सेयरमूल्य ४ प्रतिशत बढेको छ । यता शिवम् सिमेन्टको सेयरमूल्य सबैभन्दा बढी ७.११ प्रतिशत घटेको छ ।

कारोबार रकमका आधारमा आइतबार १५ करोड २२ लाख रुपैयाँभन्दा बढीको सेयर कारोबार गरेर शिवम् सिमेन्ट्स शीर्ष स्थानमा रहेको छ । नेपाल लाइफको १४ करोडभन्दा बढीको सेयर खरिदबिक्री भएको छ ।