फिल्म ‘भैरे’ ले दयाहाङको साख जोगाउला?

काठमाडौं । दयाहाङ राई पछिल्लो समय छानेर फिल्म खेल्नेमा पर्न थालेका छन् । करिअर ओरालो लाग्ने डरले उनी फिल्म छानेर खेल्न थालेका छन् । तर केही समय निरन्तर आइरहेका आफ्ना फिल्मले गर्दा दयाहाङका फिल्मले क्रेज जमाउन छोडिसकेका छन् । कुनै समय सर्वाधिक चल्तीका बनेका दयाहाङले त्यही बेला खेलेका सबै खाले फिल्मले गर्दा आफ्नो करिअरलाई नै जोखिममा मोले ।

केही महिनाको ‘ग्याप’ पछि अहिले उनी फिल्म ‘भैरे’ मार्फत दर्शकमाझ देखिँदैछन् । त्यसो त उनले यसअघि मुख्य भूमिकामै अभिनय गरेको फिल्म ‘नेप्टे’ पनि खासै चलेन नै । त्यसैले पनि उनलाई यो फिल्म चल्नुपर्ने दबाब आइरहेको छ ।

‘भैरे’ मा मुख्य भूमिकामै देखिएका दयाहाङलाई ट्रेलरका आधारमा खासै नयाँ भूमिकामा त देखिन्न तर ट्रेलर रिजिलका क्रममा निर्देशकले भनेको कुरालाई आधार बनाउने हो भने फिल्ममा भैरे बनेका दयाहाङ फरक भूमिकामा छन् । के उनको भूमिका साँच्चिकै फरक होला? त्यसका लागि भने केही समय कुर्नैपर्ने छ । तर यदि उनको भूमिका फरक भएन भने उनलाई चाहिँ करिअरको अझै जोखिम हुन्छ ।

फिल्ममा दयाहाङसँगै वर्षा शिवाकोटी, सुरक्षा पन्त, बुद्धि तामाङ लगायतका कलाकारले पनि अभिनय गरेका छन् ।

यो फिल्मलाई एभरेष्ट सूर्य बोहराले निर्देशन गरेका हुन् भने फिल्म आउँदो साउन ४ गते रिलिज हुँदैछ ।