चलचित्र ‘प्रेमगन्ज’को टिजर सार्वजनिक

काठमाडौं । चलचित्र ‘प्रेमगन्ज’को टिजर सार्वजनिक भएको छ। चलचित्र निर्माण टोलीले राजधानीमा शनिबार सम्पन्न विन्ध्यवासिनी म्युजिक अवार्डमा चलचित्रको टिजर सार्वजनिक गरेको हो।

अभिनित परिच्छेद सेनले निर्देशन गरेको चलचित्रमा अभिनेत्री सुरक्षा पन्त र बेनिशा हमालको मुख्य भुमिका रहेको छ । चलचित्रमा सुरक्षा र बेनिशासँगै सम्पदा बानियाँ, पवन भट्टराई, सुप्रिया खनाल, राइडर प्रशान्त, सिमरन खड्का, नरेश पौडेल, रश्मी भट्ट, सञ्जोग रसाइली, गीता अधिकारी लगायत कलाकारको अभिनय देख्न सकिन्छ।

अनन्तमान श्रेष्ठ कार्यकारी निर्माता रहेको चलचित्रको कथा निर्देशक सेनले लेखेका हुन्। निर्माण टोलीले फिल्मको टिजर कपिराइट फ्री रहने जनाएको छ भने निर्माण टोलीले युट्युब, फेसबुक तथा टिकटकमा टिजर राखेर धेरै दर्शकलाई देखाउनेलाई क्रमशः २५ हजार, १४ हजार र १० हजार रुपैयाँ पुरस्कारको पनि व्यवस्था गरेको छ।

श्रेष्ठका अनुसार टिजर सामाजिक सञ्जालमा सेयर गर्दा ह्यासट्याग प्रेमगन्ज भदौ ३, प्रेमगन्ज हेर्ने दिन भनेर फिल्मको अफिसियल पेजमा मेन्सन गर्दै सेयर गर्नुपर्नेछ। भिडिओ बुढासुब्बा युट्युब च्यानलबाट डाउनलोड गरेर अपलोड गर्न सकिने पनि निर्माण टिमले जनाएको छ। यो अफर वैशाख तीन गतेदेखि सुरू भएर साउन २५ गतेसम्म चल्नेछ।

चलचित्र भदौ ३ गतेदेखि प्रदर्शनमा आउने भएको छ ।