म्यानमार । म्यानमारको काचिन राज्यमा गत साताको पहिरोमा परी हराइरहेका व्यक्तिमध्ये २३ जनाको शव भेटिएको छ ।
अविरल वर्षासँगैको पहिरोमा परेर २७ जना स्थानीयबासी पुरिएका थिए ।
काचिन राज्यको एक स्थानीय टेलिभिजन ‘७ डे न्यूज’ ले आइतबार साँझसम्ममा हराएकामध्ये २३ व्यक्तिको शव भेटिएको जनाएको छ । अरु चार जनाको खोजी भइरहेको छ । तर उनीहरुलाई पनि जीवितै उद्धार गर्न सक्ने सम्भावना भने नरहेको अधिकारीहरुले जनाएका छन् ।
उक्त राज्यको सेकी मुन भन्ने गाउँमा रहेको एक कम्पनीको वरिपरि लगाइएको ९१ मिटर अग्लो पर्खाल मङ्गलबार बिहान अकस्मात भत्किएर सो दुर्घटना भएको थियो । पर्खाल भत्किएसँगै गएको पहिरोमा परेर उक्त कम्पनीको नजिकको बस्तीमा रहेका स्थानीयलाई बगाएको थियो ।
म्यानमारको उक्त राज्य उत्तरतर्फ पर्छ र त्यो विशेषगरी खानी इलाका हो । सो इलाकामा मनसुनी वर्षाको समयमा पहिरोको निकै जोखिम हुने गर्दछ ।
उक्त क्षेत्रमा यही जुलाई १४ मा पनि दुई ओटा छुट्टाछुट्टै पहिरोमा परी कम्तीमा १७ जनाको ज्यान गएको थियो । त्यसमा परी अरु ४३ जना घाइते भएका थिए ।
यो खबर पढेर तपाईलाई कस्तो महसुस भयो ?
प्रतिक्रिया