चलचित्र ‘पानीफोटो’को टिजर सार्वजनिक

काठमाडौं । खगेन्द्र लामिछानेद्वारा निर्देशित चलचित्र ‘पानीफोटो’को आधिकारिक टिजर सार्वजनिक भएको छ । उक्त टिजर हाइलाइट्स नेपालको युट्युब च्यानलमार्फत बिहीबार सार्वजनिक गरिएको हो ।

टिजर रिलिजअघि आयोजित भर्चुअल पत्रकार सम्मेलनमा निर्देशक लामिछानेले चलचित्र प्रदर्शनपछि ‘पानीफोटो’ निर्देशनको यात्रालाई समेटेर पुस्तक समेत सार्वजनिक गर्ने बताए ।

१ मिनेट ३० सेकेन्ड लामो टिजरमा चलचित्रका मुख्य कलाकार खगेन्द्रसहित अनुप बराल, मेनुका प्रधान, मलिका महत रहेका छन् ।

चलचित्रले दशक लामो सशस्त्र द्वन्द्वमा बेपत्ता छोरा खोज्ने यात्रामा निस्किएका दम्पतीको कथा पेश गरेको छ ।

मञ्जुश्री फिल्म प्रोडक्सनको प्रस्तुति रहेको चलचित्रलाई दीपक बज्राचार्यले खिचेका हुन् भने निमेष श्रेष्ठले सम्पादन गरेका हुन् ।

चलचित्रको ट्रेलर असार २८ गते रिलिज हुने जनाइएको छ भने चलचित्र साउन १३ गतेदेखि प्रदर्शनमा आउनेछ ।