काठमाडौं । अभिनेता प्रदीप खड्काले अभिनय गरेको चलचित्र ‘रोज’ को त्यति धेरै चर्चा छैन । भदौ २२ गतेबाट रिलिज हुने चलचित्रले जब ट्रेलर सार्वजनिक ग–यो, त्यसपछि हाइप घटायो । अहिले फिल्मको त्यति चर्चा छैन । बरु यही मितिमा रिलिज हुने फिल्म ‘रामकहानी’ को भने दैनिकजसो समाचार आइरहेको हुन्छ ।
सस्पेन्स थ्रीलर भनिएको चलचित्र ‘रोज’ को अझै धेरै प्राविधिक काम बाँकी छ । यसर्थ फिल्मले खासै प्रचार गर्न पनि समय निकाल्न सकेको छैन । हतार हतारमा रिलिज गर्न लागेको यो फिल्म प्रदीपकै कारण चल्छ भन्नेमा निर्माण टिम ढुक्क छ । तर, निर्माण टिमले त्यति सहजै सोचेजस्तो प्रदीपकै कारणले चल्छ भन्ने पक्का छैन । किनकि, पहिलो कुरा त फिल्मको ट्रेलरले दर्शक तान्न सकेको छैन । अर्कातिर दर्शकसम्म पनि फिल्म पुग्न सकेको छैन ।
हो, प्रदीपको क्रेज छ । तर मिडियामा फिल्मका बारेमा केही जानकारी आएन भने फिल्मलाई उठ्न पक्कै गाह्रो हुनेछ । यसै पनि प्रदीपको यसअघिको फिल्म ‘लिलिबिली’ ले पनि औसत प्रतिक्रिया पाएको थियो । हुन त उक्त फिल्मलाई सफल फिल्म भनिएको थियो ।
तर, प्रदीपको क्रेज यस्तो छ कि, फिल्मले पहिलो दिन फिल्मलाई हिट बनाउँछ भन्नेमा भने निर्माण टिम पक्का ढुक्क छ ।
यसै पनि प्रदीपको फिल्म ‘प्रेम गीत’ पछि उनले अभिनय गरेका हरेक फिल्मले पहिलो दिन हलसम्म दर्शक तान्न भने सफल भएका छन् । अब यो फिल्मले कस्तो व्यापार गर्ने हो, यसका लागि भने भदौ २२ कुर्नुपर्ने छ ।
यो खबर पढेर तपाईलाई कस्तो महसुस भयो ?
प्रतिक्रिया