काठमाडौं । एएफसी यू–१६ महिला च्याम्पियनसिप छनोट प्रतियोगिताका लागि नेपाली फुटबल टोलीको बन्द प्रशिक्षणमा छन् ।
आगामी असोज ३ गतेबाट काठमाडौंमा शुरु हुने छनोट प्रतियोगिताका लागि २३ महिला खेलाडी बन्द प्रशिक्षणमा रहेका छन् । छनोट प्रतियोगिताको समूह ‘ई’ मा रहेको नेपालले आइतवारबाट बन्द प्रशिक्षण थालेको नेपाली टोलीका मुख्य प्रशिक्षक गंगा गुरुङले जानकारी दिइन् ।
बन्द प्रशिक्षणमा सावित्री किसान, पूजा थापा, करिना धिमाल, खुस्मा राई, पुष्पा गुरुङ, सुरक्षा सिंह, सविना चौधरी, मनमाया परियार, प्रिती राई, सुष्मा तामाङ, मनिषा विष्ट, अस्मिता चौधरी, सविता रानामगर, निकिता थोकर, चन्द्रा भण्डारी, सुरक्षा सुक्रीया, मनिका घर्तीमगर, मुना मगर, श्रीषा कार्की, सुनिता सुनार, सजनी थोकर, मन्दिरा रहि र जुनु मगर सहभागी छन् ।
छनोटको लागि नेपालले पहिलो चरणमा २३ खेलाडीलाई बन्द प्रशिक्षणमा राखेको हो । बन्द प्रशिक्षणमा भुटानमा हालै सम्पन्न यू–१५ साफ च्याम्पियनसीप खेलेका अधिकांश खेलाडी छन् । मुख्य प्रशिक्षक गुरुङसहित सहायक प्रशिक्षकमा श्याम मानन्धर र गोलकिपर प्रशिक्षकमा विनोद महर्जन तथा टोलीको व्यवस्थापकमा नन्दकला थापा रहेका छन् ।
छनोट प्रतियोगिताको समूह ‘ई’ मा नेपालसहित फिलिपिन्स, मलेसिया र म्यानमार रहेका छन् । छनोट खेल अन्तर्गत नेपालले पहिलो खेल असोज ३ गते फिलिपन्ससँग खेल्नेछ । त्यस्तै, दोस्रो खेल ५ गते म्यानमार तथा अन्तिम खेल ७ गते मलेसियाविरुद्ध खेल्नेछ ।
यू–१६ महिला च्याम्पियसीप सन् २०१९ मा थाइल्यान्डमा हुनेछ । छनोट प्रतियोगिताका सबै खेल हल्चोकस्थित सशस्त्र प्रहरी बलको खेल मैदानमा हुनेछन् ।
समूह विजेताले दोस्रो चरणको यात्रा तय गर्नेछ । आयोजक थाइल्याण्डसहित, जापान, दक्षिण कोरिया र उत्तर कोरिया अर्को चरणका लागि छनोट भइसकेका छन् ।
यो खबर पढेर तपाईलाई कस्तो महसुस भयो ?
प्रतिक्रिया