काठमाडौं । गृहमन्त्री बालकृष्ण खाँणले महिला तथा बालबालिकामाथिको हिंसा रोक्न ऐन, कानुन बनाउनु परेको बताएका छन् । राष्ट्रियसभाको आजको बैठकमा गृहमन्त्री खाँणले तेजाब तथा अन्य घातक रासायनिक पदार्थ (नियमन) विधेयक, २०७९ प्रस्तुत गर्दै सो कुरा बताएका हुन् ।
गृहमन्त्री खाँणले राष्ट्रिय सभामा पेश गरेको सो प्रस्ताव सर्वसम्मतिले स्वीकृत समेत भएको छ । बैठकमा गृहमन्त्री खाँणले प्रतिनिधिसभाबाट सन्देशसहित प्राप्त उक्त विधेयकमाथि विचार गरियोस् भन्ने प्रस्ताव प्रस्तुत गरेका थिए । राष्ट्रिय सभाका अध्यक्ष गणेशप्रसाद तिमिल्सिनाले उक्त प्रस्तावलाई सर्वसम्मतिले स्वीकृत भएको घोषणा गरेका हुन् ।
उक्त विधेयकका विषयमा गृहमन्त्री खाँणले महिला तथा बालबालिकामाथि हिंसा बढ्दै गएकाले कार्वाही र नियमन गर्नका लागि यो बनाउनुपरेको बताए । ‘यस्ता पद्धार्थको उत्पादन, निकासी पैठारी, प्रयोगलाई कसरी नियन्त्रण र विस्थापन गर्ने भन्ने प्रयोजनका लागि यो ऐन ल्याउन लागिएको हो’, उनले भने, ‘तेजाबका कारण महिलाहिंसाका घटना हृदयविदारक छन्, उत्पादन गर्दा पनि व्यवस्थितरुपमा गर्नुपर्ने, आयात निर्यात गर्दा सुरक्षित बनाउन यो ऐन जरुरी भएको हो ।’
उनले भण्डारण गर्न, किन्न र बेच्न पनि सबैले नपाउने कानुन बनाउन लागिएको जानकारी दिँदै सहजरुपमा उपलब्ध हुँदा विकृति बढेको बताए । बैठकमा सांसदहरुले महिलामाथि तेजाब आक्रमणजस्ता गतिविधि हुने गरेकाले रोक्नका लागि यो ऐन बनाएर छिट्टै कार्यान्वयन गर्नुपर्ने धारणा राखेका थिए । राष्ट्रिय सभाको अर्को बैठक यही असार २८ गते बस्नेछ ।
यो खबर पढेर तपाईलाई कस्तो महसुस भयो ?
प्रतिक्रिया