रेखाको फिल्म ‘मालिका’ ट्रेलर रिलिज (भिडियो)

काठमाडौं । रेखा थापाले निर्देशन गरेको फिल्म ‘मालिका’ को ट्रेलर सार्वजनिक गरिएको छ । काठमाडौंमा एक औपचारिक कार्यक्रमको आयोजना गरी ट्रेलर सार्वजनिक गरियो ।

महिला हिंसा र बाल विवाहको विरोधमा उत्रिएको फिल्ममा रेखा थापाले हिंसाको विरुद्धमा लड्दै गरेको देख्न सकिन्छ । फिल्मको केन्द्रीय भूमिकामा कमला ओली छिन् । बालकलाकार ओलीको यो फिल्म पहिलो डेब्यु फिल्म पनि हो ।

जाजरकोटका विभिन्न स्थान र काठमाडौंमा समेत छायांकन गरिएको यो फिल्ममा  शिवम् अधिकारीको पटकथा रहेको छ । चलचित्रलाई बनिष शाहले सम्पादन गरेका हुन् भने सरस्वती थापाले निर्माण गरेकी हुन् । यस्तै फिल्ममा नर कार्की पनि निर्माताका रुपमा छन् ।

फिल्मको कन्सेप्ट नर कार्की र रेखा थापाको हो । चलचित्र आउँदो तिहारको अवसर पारेर कार्तिक १६ गते रिलिज हुँदैछ ।