काठमाडाैं । ठमेल पर्यटन विकास परिषद्को आयोजनामा प्रथम ठमेल टुरिजम भेट्रान्स कप फुटबल असोज दोस्रो सातादेखि हुने भएको छ । ठमेल पर्यटन विकास परिषद्ले शुक्रवार पत्रकार सम्मेलन गरेर भेट्रान्स कपको मिति असोज ९ देखि ११ गतेसम्म गर्ने जानकारी दिएको हो ।
प्रतियोगितामा २० टिमको सहभागिता रहने कार्यक्रम संयोजक प्रसयराज भण्डारीले जानकारी दिनुभयो । प्रतियोगिताको लागि काठमाडौं, पोखरा र धरान गरी तीन ठाँउमा आमन्त्रण पठाएको आयोजकले जनाएको छ ।
प्रतियोगितामा आयोजकबाट ठमेल इस्ट र ठमेल वेस्ट गरी दुई टिम सहभागी हुने आयोजकले जानकारी दियो । खेलकुदको माध्यमबाट सबै पक्षलाई समेट्ने सकिने र मनोरञ्जन समेत हुने भएकाले भेट्रान फुटबल प्रतियोगिताको आयोजना गर्न लागेको आयोजकको भनाइ छ ।
नकआउट प्राणालिमा सञ्चालन हुने प्रतियोगिता सेभेन ‘ए’ साइडको हुनेछ । प्रत्येक टिममा एकजना ४० वर्ष र ५० वर्ष पूरा भएको खेलाडी हुनैपर्ने आयोजकले प्रावधान राखेको छ । प्रतियोगिताको विजेताले दुई र उपविजेताले एक लाख रुपैयाँ प्राप्त गर्नेछन् ।
तीन दिनसम्म चल्ने प्रतियोगिताको ‘म्यान अफ दि सिरिज’, सर्वाधिक गोलकर्ता र उत्कृष्ट गोलकिपरले समान १०/१० हजार रुपैयाँ पाउनेछन् ।
यो खबर पढेर तपाईलाई कस्तो महसुस भयो ?
प्रतिक्रिया