बंगबन्धु गोल्डकप फुटबल : आयोजक बंगलादेशको सेमिफाइनल प्रवेशको सम्भावना बलियो, लाओस पराजित

बंगलादेश। पाँचौ संस्करणको बंगबन्धु गोल्डकप फुटबल प्रतियोगिता सोमवारदेखि शुरु भएको छ । 

सोमवारराति सम्पन्न भएको उद्घाटन खेलमा आयोजक बंगलादेशले लाओसलाई १-० गोल अन्तरले पराजित गर्दै प्रतियोगितामा विजयी शुरुवात गरेको हो ।

निक्कै प्रतिस्पर्धात्मक खेलको पहिलो हाफसम्म दुवै टिम गोलरहित बराबरीमा रोकिएका थिए । दोस्रो हाफमा केही सुधारिएको खेल खेलेको बंगलादेशका लागि ५९ औँ मिनेटमा विप्लोले गरेको एक मात्र गोल नै निर्णायक बनेको थियो ।

निर्धारित समयसम्म लाओसले पनि केही गोल गर्ने मौका पाएपनि सदुपयोग भने गर्न सकेन र खेलमा १-० को हार बेहोर्‍यो । जीतसँगै बंगलादेशले सेमिफाइनलमा प्रवेश गर्ने सम्भावनालाई बलियो बनाएको  छ ।