खोटाङ । खोटाङको दिप्रुङ चुइचुम्मा गाउँपालिका-६ छितापोखरीको मैस्याङटार आन्तरिक पर्यटकको गन्तव्यस्थल बन्न थालेको छ । अग्लो डाँडामा रहेको, हरिया चौर र वरपर जंगलले घेरिएको मैस्याङटार पछिल्लो समय आन्तरिक पर्यटकको गन्तव्यस्थलको रूपमा विकास हुँदै गएको हो ।
मैस्याङटारमा नयाँ वर्ष, दशैंतिहार, साकेला उभौली र मंसिर लागेपछि आन्तरिक पर्यटक पुग्ने गरेका छन् । पर्यटकीयस्थल मैस्याङटारमा स्थानीय पिकनिक जाने गरेका थिए । तर पछिल्लो समय घुमफिर र भ्रमण गर्ने स्थानीयको बाक्लो उपस्थिति देखिन थालेको वडाध्यक्ष मिलन राईले बताए ।
मैस्याङटारको पर्यटन प्रवर्द्धनका लागि स्थानीय सरकारको नेतृत्वमा ध्रुवस्मृति पार्क, मैस्याङटारको शिरमा पुग्ने पदमार्गलगायतका संरचना बनिसकेको छ । यस्तै, सुम्निमा(पारुहाङ पार्क निर्माणको काम भइरहेको छ । डाँडाका ठाउँठाउँमा बसेर रमिता हेर्न र आराम गर्न फलामका फलैंचा बनाइएको छ ।
मैस्याङटारको डाँडामा शिव-पार्वती, गणेश मूर्ति, गुराँस पार्क निर्माण गर्ने योजना बनाइएको दिप्रुङ चुईचुम्मा गाउँपालिका अध्यक्ष लोकेन्द्र राईले बताए । यस्तै, मैस्याङटारको हरिया चौर र पाखोमा चिया बगान बनाउने, चौरी पालन गर्नेदेखि होमस्टेको योजना अघि सारिएको छ ।
घुमफिरसँगै वरपरका दृश्यावलोकनका लागि स्थानीय मैस्याङटार पुग्ने गरेका छन् । उत्तरका हिमाल सगरमाथादेखि दक्षिणमा तराईका फाँट दृश्यावलोकन गर्न सकिने मैस्याङटारमा मलायो पोखरी, रमणीय चौर, हरिया थुम घुमफिर गर्न सकिन्छ । आफन्त तथा इष्टमित्रलाई नयाँ ठाउँ घुमाउन परेपनि दिप्रुङ चुइचुम्माबासीको रोजाइमा मैस्याङटार पर्ने गरेको छ । सफा मौसम भएका बेला तराईका भीमनगरसमेत देखिने वडाध्यक्ष राईले बताए ।
मैस्याङटार पुग्न कच्ची सडक बनिसकेको छ । सडकबाट उत्तीस र सल्लाको जंगल पार गर्दै करिब १० मिनेट पैदल हिँडेपछि मैस्याङटारको डाँडामा पुगिन्छ । कुनै चाड वा अवसरका बेला मैस्याङटार पुग्ने स्थानीयले सडकमा पार्किङ गरेको सवारीसाधनले सहरको झल्को दिने गरेको स्थानीय गणेशकुमार कार्कीले बताए ।
परापूर्वकालमा ‘महिलाले हलो जोत्नु हुँदैन’ भन्ने समयमा मैस्याङ नाम गरेकी तामाङ महिलाले खुकुरी भिरेर हलो जोतेर खेती गरेकाले सो डाँडाको नाम नै मैस्याङटार रहन पुगेको इतिहास छ । मैस्याङ दिहुँबाट आएर सो स्थानमा बसेर खेतीपाती गरेर बसेको कार्कीले बताए ।
यो खबर पढेर तपाईलाई कस्तो महसुस भयो ?
प्रतिक्रिया