बंगलादेश साफ महिला च्याम्पियनसिपको फाइनलमा

काठमाडौं । भुटानलाई हराउँदै बंगलादेश साफ महिला च्याम्पियनसिपको फाइनल प्रवेश गरेको छ । आज भएको पहिलो सेमिफाइनल खेलमा भुटानलाई ८–० को फराकिलो अन्तरले हराउँदै बंगलादेशले फाइनलमा स्थान पक्का गरेको हो ।

बंगलादेश २०१६ पछि पहिलो पटक फाइनल प्रवेश गरेको छ । त्रिपुरेश्वरस्थित दशरथ रंगशालामा भएको खेलमा पहिलो हाफमा ४–० को अग्रता लिएको बंगलादेशले दोस्रो हाफमा ४ गोल थप्दै भुटानमाथि फराकिलो जित दर्ता गरेको हो ।

बंगलादेशलाई फाइनल पुर्‍याउन कप्तान सबिना खातुनले प्रतियोगिताको दोस्रो ह्याट्रिक गरिन् । बंगलादेशसँगको यो हारसँगै पहिलो पटक सेमिफाइनल पुगेको भुटान सेमिफाइनलबाटै बाहिरिएको छ ।

दशरथ रंगशालामा हुने दोश्रो सेमिफाइनलमा साँझ साढे पाँच बजे नेपालले भारतसँग खेल्ने छ ।