जनकपुरधामले धार्मिक पर्यटनको ठुलो सम्भावना बोकेको छ : मन्त्री चौधरी

धनुषा । सहरी विकास मन्त्री मेटमणि चौधरीले धार्मिक एवम् सांस्कृतिक धरोहर जनकपुरधामले धार्मिक पर्यटनको ठुलो सम्भावना बोकेको बताएका छन् । जलेश्वर–जनकपुर–धनुषाधाम धार्मिक पर्यटकीय कोरिडोरमा पर्ने मठ, मन्दिर सौन्दर्यीकरणको लागि पूर्वाधार निर्माण आयोजनाको शिलान्यासपछि आयोजित सभामा बोल्दै मन्त्री चौधरीले ऐतिहासिक सम्पदा जनकपुरधाम भ्रमण गर्न वर्षेनी लाखौँ पर्यटक आउने गरेका बताउँदै खासगरि हिन्दु धर्ममा विश्वास गर्नेहरुको लागि यो पवित्र स्थल रहेको र यसको मौलिकता जोगाउँदै यस क्षेत्रलाई सौन्दर्यीकरण गर्न सके यस क्षेत्रले धार्मिक पर्यटनको ठुलो सम्भावना बोकेको बताएका हुन् ।

जनकपुरधाम नेपालमा मात्र नभई विश्वमै परिचित स्थल रहेको बताउँदै मन्त्री चौधरीले सहरी मन्त्रालयले यस क्षेत्रको विकासमा कुनै कसर बाँकी नराख्ने सुनाउँदै भने, ‘तपाईंहरु फटाफट काममा जुट्नुस् । हामीले बजेटको निरन्तर व्यवस्था मिलाउने छौँ । बजेट अभावका कारण आयोजना रोकिने स्थिति आउने छ्रैन । काम निर्धारित समयभित्रै सक्नुस् । काम गर्दा गुणस्तरीयतामा कमि नहोस् । तपाईंहरुले पनि निरन्तर आयोजनाहरुको निगरानी गर्नुस् ।’

आयोजना अन्तर्गत जलेश्वर–२, मा सांस्कृतिक सामुदायिक भवनको स्तरोन्नती, बोधिमाई मन्दिर परिसरमा घाट निर्माण, ट्रयाक स्तरोन्नती, जनकपुरधाम स्थित रामजानकी कुट्टीमा रहेको सांस्कृतिक भवन स्तरोन्नती, जनकपुरधाम–४ मा मिथिला परिक्रमा विश्राम भवन निर्माण, मिथिला बिहारी नगरपालिका कचुरीमा सांस्कृतिक भवन तथा विवाह मण्डप निर्माण, धनुषाधाम मन्दिर परिसरमा रहेको सांस्कृतिक भवनको स्तरोन्नतीलगायतका योजनाहरु रहेका छन् । आयोजनाको कुल अनुमानित लागत १० करोड रुपैयाँ रहेको छ ।

त्यसैगरि, सहरी मन्त्री चौधरीले जनकपुरधाम उपमहानगरपालिकामा सडक तथा नाला निर्माण कार्यक्रम अन्तर्गत दुर्गाचोक–रेल्वे ट्रयाक सडक खण्डमा सहरी सडक तथा नाला स्तरोन्नती कार्यको पनि शिलान्यास गरेका छन् । जस अन्तर्गत २ दशमलव २ किलो मिटर लम्बाईमा १६ मिटर चौडा सहरी सडकको मापदण्ड अनुसार साइकल लेन, फुटपाथको व्यवस्था हुने बताइएको छ । दुवैतर्फ बिरुवा रोपेर हरियाली कायम गरिने जनाइएको छ । यस आयोजनाको अनुमानित लागत २० करोड रुपैयाँ रहेको छ ।

पूर्व राष्ट्रपति डाक्टर रामबरण यादवसँग जनकपुर ओर्लेका मन्त्री चौधरी, डाक्टर यादवले जनकपुर नगरपालिका–९ स्थित सरस्वती मावि परिसरको भौतिक पुर्वाधारसहित सडक नाला, पोखरी सौन्दर्यीकरण तथा वातावरण सुधार आयोजनाको शिलान्यास गर्ने कार्यक्रममा समेत सामेल भएका थिए ।

कार्यक्रममा सहरी विकास मन्त्रालयका सचिव डाक्टर रमेशप्रसाद सिंह, सहरी विभागका उपमहानिर्देशक नारायण भण्डारी, संघीय आयोजना कार्यान्वयन इकाइ, धनुषाका आयोजना प्रमुख प्रदिप खनाल, स्थानीय जनप्रतिनिधिलगायतले आआफ्ना मन्तव्य राखेका थिए ।