दसैँको बन्दअघि नेप्से १६ अंकले बढ्यो

काठमाडौं । सेयर बजार लगातार तेस्रो दिन बिहीवार पनि बढेको छ । सेयर बजार परिसूचक नेप्से आज १६ दशमलव २९ अंकले बढेर १ हजार ८५३.७६ विन्दुमा पुगेको छ । जीवन बीमाबाहेक सबै समूहको सेयर बढेकोमा माइक्रो फाइनान्स र उत्पादन समूहको सेयर भने उच्च अंकले वृद्धि भएको छ ।

कारोबार रकम पनि बुधवारको तुलनामा सामान्य बढेको छ । बुधवार ४८ करोड रुपैयाँको कारोबार भएकोमा आज दुई सय २३ वटा कम्पनीका १७ लाख ९१ हजार कित्ता सेयर ६३ करोड २४ लाख रुपैयाँमा कारोबार भएको छ । सबैभन्दा धेरै नेपाल इन्स्युरेन्स कर्पोरेसनको प्रमोटर सेयर चार करोड ४८ लाख रुपैयाँमा किनबेच भयो ।

आज अभियान लघुवित्तको सेयर १० प्रतिशत तथा गुराँस लघुवित्त, समिट लघुवित्त, जनउत्थान सामुदायिक लघुवित्त र एनआईबीएल ब्यालेन्स फन्डको सेयर पाँच प्रतिशतभन्दा धेरैले बढेको छ । साम्लिङ पावर कम्पनीको सेयर भने झन्डै आठ प्रतिशतले घटेको छ ।