कास्की । पोखरामा आयोजित नवौँ राष्ट्रिय खेलकुद २०७९ अन्तर्गत शुक्रबार भएको महिला ट्वान्टी–२० क्रिकेट खेलमा नेपाल पुलिस क्लब विजयी भएको छ ।
पुलिस क्लब लगातार तेस्रो खेलमा पनि विजय भएको हो ।
क्रिकेट प्रतियोगितामा नेपाल पुलिस क्लबले लुम्बिनी प्रदेशलाई ९७ रनले पराजित गरेको हो ।
पोखरा रंगशालास्थित क्रिकेट मैदानमा टस जितेर पहिलो ब्याटिङ गरेको नेपाल पुलिस क्लबले निर्धारित २० ओभरमा ७ विकेटको क्षतिमा १ सय १२ रनको योगफल तयार बनाएको थियो ।
जवाफी ब्याटिङमा आएको लुम्बिनी प्रदेशले १२.५ ओभरमा १० विकेटको क्षतिमा १५ रन मात्र बनाएको थियो ।
प्रतियोगिता अन्तर्गत ब्याटिङतर्फ नेपाल पुलिस क्लबकी काजल श्रेष्ठले १ रन, रुबिना क्षेत्रीले ५ रन, सम्झना खड्काले २९ रन, अप्सरी बेगमले १० रन, सोभा रोकायले १ रन, कविता जोशीले ४८ रन, ईश्वरी विष्टले १ रन र सबनम राईले २ रन जोडेका थिए । पुलिस क्लबले अतिरिक्त १५ रन प्राप्त गरेको थियो ।
बलिङतर्फ नेपाल पुलिस क्लबकी ईश्वरी विष्टले ४ विकेट, हिरुमई राय र रूबिना क्षेत्रीले समान २ विकेट र सबनम राईले १ विकेट लिएका थिए ।
खेलमा ४८ रन बनाएकी नेपाल पुलिस क्लबकी कविता जोशी प्लेयर अफ द म्याच घोषित भइन् ।
जितसँगै नेपाल प्रहरीको महिला क्रिकेट टिम समूह ‘बी’ मा ६ अंक सहित समूह विजेता बन्दै सेमिफाइनममा प्रवेश गरेको छ ।
नेपाल प्रहरीको महिला क्रिकेट टिमले असोज ३१ गते समूह ‘ए’को उपविजेतासँग सेमिफाइनल खेल खेल्नेछ ।
यो खबर पढेर तपाईलाई कस्तो महसुस भयो ?
प्रतिक्रिया