काठमाडौं । चलचित्र ‘बुलबुल’ को गीत फरक तरिकाले सार्वजनिक गरिएको छ । निर्माण टिमका अनुसार चलचित्र युनिटले ‘खुद्राखुद्री’ बोलको गीतलाई काठमाडौं लगायत देशका पाँच शहरमा फ्ल्यास मोब शैलीमा डान्स गराएर सार्वजनिक गरेको हो । यस्तै गीतको भिडियोलाई आजैदेखि युट्युबमा पनि हेर्न सकिनेछ ।
काठमाडौंको सुन्धारास्थित काठमाडौं मलमा फिल्मकी नायिका स्वस्तिमा खड्कासँगै अन्य डान्सरलाई पनि नचाएर फिल्मको गीत सार्वजनिक गरिएको थियो । गीत हेर्न सर्वसाधारणको पनि बाक्लो उपस्थिति रहेको थियो ।
‘खुद्राखुद्री माया’ मा रजिना रिमाल र निश्चल बस्नेतको स्वर रहेको छ भने कोशिश क्षेत्रीले गीत लेख्ने र संगीत भर्ने काम गरेका हुन् । यस्तै गीतको भिडियोलाई कविराज गहतराजले कोरियोग्राफी गरेका छन् भने सुशान प्रजापतिले भिडियोको छायांकन गरेका हुन् ।
युट्युबमा रिलिज गीतमा स्वस्तिमा खड्का र मुकुन भुसाल लगायतको नृत्य देख्न सकिन्छ । यो गीतलाई भक्तपुरको हेल्मेट डाँडामा छायांकन गरिएको थियो ।
आउँदो फागुन ३ गतेदेखि प्रदर्शनमा आउने चलचित्रलाई विनोद पौडेलले निर्देशन गरेका हुन् भने फिल्ममा मुकुन र स्वस्तिमाका अलावा बुद्धि तामाङ, लक्ष्मी बर्देवा, दीपक क्षेत्री, उज्जवल अधिकारी, जोयस पाण्डे लगायतका कलाकारले अभिनय गरेका छन् ।
चलचित्रको कथा एक टेम्पो चालक महिलाको कथा हो ।
भिडियो/तस्वीरः अर्घेलो थापा
बुलबुलको गीती भिडियो हेर्नुहोस्ः
यो खबर पढेर तपाईलाई कस्तो महसुस भयो ?
प्रतिक्रिया