आर्सनल र टोटनहम पराजित

काठमाडौं । प्रिमियर लिगमा महारथि क्लब आर्सनल र टोटनहम कारोबाओ कपमा पराजित हुँदै तेस्रो चरणबाटै बाहिरिएका छन् । आर्सनल घरेलु मैदानमा ब्राइटनसँग ३–१ स्तब्धपूर्ण नतिजा निकाल्यो । ब्राइटनका डेनी वेल्बेक, काओरु मिटोमा र टारिक लाम्पटेले गोल गरे । आर्सनललका एडि एनकेटिआले एक गोल गरेका थिए ।

पछिल्लो २० खेलमा आर्सनलले हारेको यो तेस्रो खेल हो । प्रशिक्षक माइकल अर्टेटाले चेल्सीसँग खेलेको टोलीबाट १० खेलाडी परिवर्तन गरेका थिए । अर्काे खेलमा १० खेलाडीमा सिमित नटिङ्घम फोरेस्टले टोटनहमलाई २–० अन्तरले पराजित गरेको हो ।

पहिलो हाफमा दुबै टोलीले गोल गर्न सकेनन् । फोरेस्टका रेनान लोडीले खेलको ५० औं मिनेटमा अग्रता लिए । जस लिङ्गार्डले ५७ औं मिनेटमा काउन्टरमा गोल गर्दा २–० को अग्रता बनायो । खेलको ७५ औं मिनेटमा फोरेस्टका मंगलाले रातोकार्ड पाएका थिए ।