काठमाडौँ । नेपाली खेलकूदमा ऐतिहासिक सफलता पाएका ओलम्पियन एवं तेक्वान्दो खेलाडी विधान लामाको प्रतिमा स्थापना गरिने भएको छ ।
सोमवार रिपोर्टर्स क्लबमा आयोजित पत्रकार सम्मेलनमा ओलम्पियन लामाको आगामी ६ महिनाभित्र मूर्ति स्थापना गरिने जानकारी दिएको हो । नेपाल तामाङ घेदुङ संघले लामाको मूर्ति निर्माणका लागि समिति बनाएर कार्य योजना छिट्टै तयार गर्ने जनाएको छ ।
समितिका संयोजक डिएन घिसिङ तीन दशक अगाडि नेपालको नाम र इज्जत विश्वभर फैलाउन सफल लामाको प्रतिमा स्थापना गर्न लागिएको जानकारी दिए । लामाको मूर्ति काठमाडौँ महानगरपालिका–२६ लैनचौरस्थित उनकै जन्मथलोमा बनाइने छ ।
लामाले सन् १९८४ देखि १९९० सम्म राष्ट्रिय टिमबाट तेक्वान्दो खेलेका थिए । उनले सन् १९८६ मा पहिलो पटक १० औँ एशियाली खेलमा नेपालको तर्फबाट कास्य पदक तथा सन् १९८७ मा स्पेनमा भएको ८औँ विश्व तेक्वान्दो च्याम्पियनसिपमा कास्य पदक जितेका थिए ।
लामाले सन् १९८८ को आठौँ एशियन च्याम्पियनसिपमा रजत पदक समेत जितेका थिए ।
त्यसैगरी दक्षिण कोरियाको सोलमा सम्पन्न २४ औँ ग्रीष्मकालीन ओलम्पिक खेलमा लामाले कास्य पदक भित्र्याएका थिए । पत्रकार सम्मेलनमा आफ्नो खेल जीवनबारे स्मरण गर्दै लामाले सहयोग गर्ने सबैलाई धन्यवाद दिए ।
आफूलाई साधारण खेलाडीका रुपमा मात्रै लिन आग्रह गर्दै उनले पढ्ने बेला भागेर ब्रुस लिको चलचित्र हेर्न जाने गरेको र त्यसैबाट प्रभावित भई तेक्वान्दोतर्फ आकर्षित भएको बताए ।
नेपालमा २०३९ सालपछि मात्रै सर्वसाधारणलाई तेक्वान्दो खेल्न दिइएको लामाको भनाइ थियो ।
उनले आफू पनि त्यसपछि मात्रै तेक्वान्दो खेल्न थालेको बताए । नेपालको इतिहासमा जिवित खेलाडीको मूर्ति बन्न लागेको यो पहिलो पटक हो ।
यो खबर पढेर तपाईलाई कस्तो महसुस भयो ?
प्रतिक्रिया