दाङ । नेपाल एयरलाइन्सले दाङको तुलसीपुरमा हवाई सेवा थप गरेको छ ।
सो एयरलायन्सले काठमाडौंबाट तुलसीपुरमा सातामा दुई दिन हुँदै आएको हवाई उडान सेवा गर्न लागेको हो । अब उडान यहि मंसिर १ गतेदेखि सातामा तीन दिन हुनेछ । हाल एयरलायन्सले सातामा दुई दिन सोमवार र शुक्रवार मात्र काठमाडौंदेखी तुलसीपुरमा उडान भर्दै आएको छ ।
हवाई यात्रुको संख्यामा वृद्धि भएको भन्दै बुधवार समेत थप गरेर सातामा तीन दिन उडान भर्न लागिएको नेपाल वायुसेवा निगमका प्रवक्ता अशोक सिग्देलले जानकारी दिए ।
साथै उनले मंसिर महिनाभरमा यात्रुको चाप र माग भए पुस महिनाबाट दैनिक हवाई सेवा सञ्चालनका लागि निगमले तयारी गरिरहेको पनि बताए ।
लामो समयदेखि बन्द रहेको तुलसीपुरस्थित टरिगाउँ विमानस्थलमा नेपाल एयरलाइन्सले गत असोज १६ गते मात्र सफल परीक्षण उडान गरेको थियो । त्यसपछि सातामा दुई दिन सेवा दिँदै आएको थियो।
यो खबर पढेर तपाईलाई कस्तो महसुस भयो ?
प्रतिक्रिया