आकाशले ‘वीर विक्रम २’ छोड्नासाथ पल शाहको इन्ट्री

काठमाडौं । केही दिनअघि निकै तामझामसाथ चलचित्र ‘वीर विक्रम २’ निर्माण हुने औपचारिक घोषणा गरियो । उक्त कार्यक्रममा आकाश श्रेष्ठ, नाजिर हुसेन, वर्षा शिवाकोटी लगायतले फिल्ममा मुख्य भूमिका निभाउने जानकारी दिइयो ।

फिल्म निर्माणको घोषणा भएको केही दिनमै फिल्मका कलाकारमध्येका एक कलाकार आकाश श्रेष्ठले चलचित्र ‘वीर विक्रम २’ मा अभिनय नगर्ने भएका छन् । उनले सामाजिक सञ्जाल फेसबूकमार्फत फिल्म नखेल्ने बताएका हुन् ।

चलचित्र छोड्नुको कारण आफ्ना बिरामी हजुरबुबा भएको आकाशले जानकारी दिएका छन् । उनले फेसबूकमा लेखेका छन्, ‘सबैभन्दा पहिला त क्षमाप्राथी छु, मैले खेल्ने भनेको चलचित्र ‘वीर विक्रम २’ म मेरो हजुरबुबा बिरामी भएको हुँदा उहाँको उपचारमा समय दिनुपर्ने कारणले गर्दा यो चलचित्रमा समय दिन नसक्ने भएको छु, मिलन दाइसँग काम गर्न पाउनु मेरो लागि ठूलो सौभाग्य थियो, खुशी पनि थिएँ तर यो टिमलाई साथ दिन सकिन । म आवद्ध नभए पनि ‘वीर विक्रम २’ लाई सफलताको शुभकामना छ ।’

स्टाटस लेख्दै आकाशले आफू निर्देशक मिलन चाम्ससँग काम गर्न चाहेको र प्रतीक्षा समेत गरेको बताएका छन् ।

यता मिलन चाम्सले एक विज्ञप्ति जारी गर्दै चलचित्रमा आकाश श्रेष्ठले समय दिन नसकेपछि पल शाहलाई अनुबन्ध गरेको बताएका छन् । उनले विज्ञप्तिमार्फत आकाशका हजुरबुबाको शीघ्र स्वास्थ्य लाभको कामना गरेका छन् ।

चलचित्रमा नाजिर हुसेन, बुद्धि तामाङ, वर्षा शिवाकोटी लगायतका कलाकारको भने अभिनय रहनेछ ।