कङ्गो । कङ्गोमा सैनिक कारबाहीका क्रममा आठ जना शान्ति सैनिक मारिएका छन् ।
प्रजातान्त्रिक गणतन्त्र कङ्गोको पूर्वी भेगमा सैनिक कारबाहीका क्रममा संयुक्त राष्ट्रसंघमा आबद्ध आठ जना शान्ति सैनिकको विद्रोहीको आक्रमणमा परी मृत्यु भएको सुरक्षा परिषदले जनाएको छ ।
परिषदका अनुसार मारिने सुरक्षाकर्मीमा तान्जानीयाका एक जना र मलावीका सात जना रहेका छन् ।
कङ्गोमा राष्ट्रसंघीय शान्ति सेनाको यो दोस्रो ठूलो क्षति हो । गत वर्ष १५ जना शान्ति सैनिकको विद्रोहीको आक्रमणबाट मृत्यु भएको थियो ।
गत बिहीबार, मोनुस्को शान्ति सेनाका उपप्रमुख जनरल बर्नार्ड कोमिन्सले कङ्गोमा सक्रिय लडाकू समूह एलाइड डेमोक्रेटिक फोर्स (एडीएफ) का विरुद्धमा मङ्गलबार कङ्गोको सरकारी सेनासँग मिलेर संयुक्त सैन्य कारबाही गरिएको बताए । जिहादी समूह एडीएफले कङ्गोका सर्वसाधारणमाथि बेलाबेला क्रुर हमला गरिआएको छ ।
कोमिन्सले बेनीबाट करिब २० किलोमिटर टाढाको किडीडीवेमा सैनिक कारबाही गरिएको जानकारी दिनुभयो । यो सहरमा करिब तीन लाख मानिसको बसोबास छ ।
“हाल किडिडीवे हाम्रो नियन्त्रणमा छ । यसक्रममा निकै हिंसात्मक सङ्घर्ष समेत भएको छ । अहिले, हामीले घाइते कङ्गोली सेना र शान्ति सेनालाई त्यहाँबाट उद्धार गरिरहेका छौं,” कोमोन्सले बताउनुभयो । बुधबारको भिडन्तमा आफ्ना चार सैनिकको ज्यान गएको मलावीको रक्षा मन्त्रालयले पुष्टी गरेको छ ।
कोमोन्सले किडिडीवे एडीएफको महत्वपूर्ण र बलियो आधार इलाका रहेको बताए ।
मोनुस्कोमा हाल करिब १७ हजार सैनिक छन् र राष्ट्रसंघको यो सबैभन्दा ठूलो शान्ति अभियान हो । दोस्रो कङ्गोली युद्धका क्रममा स्न १९९९ मा स्थापित मोनुस्कोको वार्षिक बजेट करिब १ अर्ब १५ करोड डलर छ ।
यो खबर पढेर तपाईलाई कस्तो महसुस भयो ?
प्रतिक्रिया