नेयमार दा सिल्भा सान्तोस जुनियर, फुटबल जगतको उत्कृष्ट फरवार्डहरू मध्ये एक हुन् । फुटबल जगतमा ब्राजिलियन फुटबलरहरुले धेरै सफलता हात पारेका छन् । विश्वका दुई उत्कृष्ट फुटबल क्लबमा नेयमारले खेलिसकेका छन् । र उनी हाल पीएसजीमा आवद्ध छन् । नेयमारले आफ्नो क्यारियरमा धेरै सफलता हासिल गरेका छन् ।
नेयमारले सन् २००९ मा स्थानीय क्लब सान्तोसबाट खेल्दै आफ्नो करियर शुरु गरेका थिए । उनी २०१३ मा स्पेनिस क्लब बार्सिलोनामा आए । उनले २०१४-०१५ सिजनमा क्याटालान्ससँग ट्रेबल (लिग उपाधि, कोपा डेल रे र च्याम्पियन्स लिग) जितेका थिए । नेयमारले १८ वर्षको उमेरमा राष्ट्रिय टोलीमा डेब्यु गरेका थिए ।
ब्राजिलियन स्टार नेयमारका पाँच तथ्य यस्ता छन् :
१. एजेन्ट नै बुबा
स्टार खेलाडी नेयमार आफ्नो परिवारद्वारा निर्देशित छन् । उनको मैदानबाहिरका हरेक निर्णय उनका बुबाले गर्दछन् । उनका बुबा, नेयमार सन्टोस सिनियर, उनको एजेन्ट हुन् ।
२. नेयमारको आँखाको ट्याटु
नेयमारकी आफ्नी बहिनी राफेल बेक्रनले नेयमारको आँखाको ट्याटु खोपेकी छिन् । राफेल बेक्रनले आफ्नो अनुहारमा खोपेको ट्याटुमा नेयमारको आँखा बनाइएको छ ।
३. जन्म दिनमा एक सय गोल
नेयमारले २०१२ मा २० औं जन्म दिन मनाएका थिए । सोहि दिन उनले आफ्नो फुटबल यात्रामा एक सय गोल पूरा गरेका थिए ।
४. अभिनयका लागि अफर
जुन २०१६ मा विन डीजलले नेयमारलाई एक्सन फिल्म रिटर्न अफ एक्सजेनदर केजमा उनीसँग अभिनय गर्ने बताएका थिए । उनी स्वयं नेयमारसँग खेल्न आएका थिए । फिल्ममा सामुएल एल ज्याक्सनद्वारा अभिनित पात्रले राष्ट्रिय सुरक्षा एजेन्सीमा सहभागी हुनका लागि नेयमारलाई अनुबन्ध गर्ने कोशिस गरेको थियो ।
५. ओलम्पिक इतिहासमा सबैभन्दा छिटो गोल
नेयमारले २०१६ को समर ओलम्पिकमा होन्डुरसविरुद्ध ब्राजिलको सेमिफाइनल खेलमा ओलम्पिक इतिहासमा सबैभन्दा छिटो गोल गर्ने कीर्तिमान बनाए । नेयमारले १४ सेकेन्डमा गोल गरेका थिए ।
यो खबर पढेर तपाईलाई कस्तो महसुस भयो ?
प्रतिक्रिया