काठमाडौं । नेपाल आइडलको दोस्रो संस्करण यतिबेला जारी छ । एपीवान एचडीबाट प्रसारण भइरहेको यो रियालिटी शो ले दर्शकको ध्यान तानेको पनि छ । आइडलका प्रतिस्पर्धीमा विक्रम बराल पनि छन् । उनले शोमा गाएका गीतले दर्शकको ध्यान खिचेका पनि छन् ।
उनै बरालले मंसिर २१ गतेबाट प्रदर्शनमा आउने चलचित्र ‘प्रसाद’ को एक गीत गाएका छन् । उनले गाएको गीत सेन्टिमेन्टल छ । काठमाडौंको नक्सालस्थित एक स्टुडियोमा गीत रेकर्डिङ गर्दै गर्दा भेटिएका बरालले पहिलो गीत गाउँदा आफूलाई निकै खुशी मिलेको पनि बताए । साथै गीत रेकर्डपछि निर्माण टिमले बराललाई पारिश्रमिक पनि हस्तान्तरण गरेका थिए ।
फिल्मका निर्देशक दिनेश राउतले चल्तीका कलाकारकै बराबरमा विक्रमलाई पारिश्रमिक दिएको बताए ।
रेकर्ड गरिएको उक्त स्याड गीतमा सारङ्गीको मीठो धुन पनि सुन्न सकिन्छ । गीत रेकर्ड गराएसँगै बरालले पत्रकारसँग कुराकानी पनि गरेका थिए । आफूले पहिलोपटक यसरी गीत रेकर्ड गराएको बताउँदै उनले नेपाल आइडल र प्रसाद टिमलाई धन्यवाद समेत दिए ।
‘यो मेरो पहिलो रेकर्ड पनि हो, थोरै नर्भस त भएको छु, तर निकै रमाइलो लागिरहेको छु ।’, बरालले भने ।
निःसन्तान दम्पतीको कथाको जीवनमा आएका उतारचढावलाई कथानक बनाएर तयार पारिएको उक्त फिल्ममा विपिन कार्की, निश्चल बस्नेत र नम्रता श्रेष्ठ मुख्य भूमिकामा छन् । फिल्ममा विपिन र नम्रता पतिपत्नीको भूमिकामा देखिएका छन् ।
फिल्मको कथा सुशील पौडेलले लेखेका हुन् ।
यो खबर पढेर तपाईलाई कस्तो महसुस भयो ?
प्रतिक्रिया