काठमाडौं । नायिका ओमु निमाको जन्मदिन पारेर चलचित्र ‘मेतोक’ को टिजर सार्वजनिक गरिएको छ । ठिलेन इन्टरनेटमेन्टको प्रस्तुतिमा निर्माण भएको यो चलचित्रको टिजर युट्युबमार्फत सार्वजनिक गरिएको हो ।
फिल्म युनिटले काठमाडौंमा पत्रकार भेटघाट गरी चलचित्रका बारेमा जानकारी समेत गराउँदै फिल्मकी नायिका ओमु निमा ह्योल्मोको जन्मदिनको केक काट्यो । आफ्नो जन्मदिन मनाउँदा ओमुले खुशी व्यक्त गरिन् ।
झण्डै पचास लाखमा निर्माण भएको यो सिनेमा ह्योल्मो भाषामा हुनेछ । ठिलेन लामाको निर्देशन रहेको यो फिल्मले ह्योल्मो संस्कृति र भाषालाई जोगाउन फिल्म निर्माण गरेको बताइएको छ ।
चलचित्रलाई सर्किनी ज्याबा ह्योल्मोले निर्माण गरेकी ह्न् भने फिल्ममा निर्देशक ठिलेन लामाकै कथा रहेको छ । यस्तै यो फिल्मलाई रामकुमार केसीले छायांकन गरेका हुन् भने सन्देश शाहको सम्पादन रहनेछ ।
फिल्मलाई सिन्धुपालचोकको हेलम्बु, मुस्ताङ र काठमाडौंका विभिन्न स्थानमा छायांकन गरिएको हो । चलचित्रमा ठिलेन लामा ,ओमु निमा ह्योल्मो ,दावा दोर्जे ,डोमा ह्योल्मो ,छेम्बेल ह्योल्मो ,भिम ज्याबा ,कान्छीमाया ह्योल्मो ,पेमा ह्योल्मो लगायत कलाकारको अभिनय रहेको छ । ह्योल्मो भाषामा बन्ने चलचित्र मेतोकलाई डल्ले ह्योल्मोले अनुवाद गर्ने भएका छन् ।
यो खबर पढेर तपाईलाई कस्तो महसुस भयो ?
प्रतिक्रिया