काठमाडौं । सिभिल बैंक लिमिटेडको १२ औँ वार्षिक साधारण सभा सम्पन्न भएको छ । बैंकले बिहीबार कालिकास्थानस्थित अमृतभोग बैंक्वेटमा वार्षिक साधारण सभा सम्पन्न गरेको हो ।
उक्त साधारण सभाबाट संचालक समितिले प्रस्ताव गरेबमोजिम बैंकको चुक्ता पूँजीको पाँच प्रतिशत बराबरको बोनश शेयर तथा कर प्रयोजनको लागि प्रतिशेयर शुन्य दशमलव २६ प्रतिशत नगद लाभांश वितरण गर्न सर्वसम्मतीले स्वीकृत प्रदान गरेको छ ।
साथै सभाले आर्थिक वर्ष २०७९/८० को लेखापरीक्षण गर्नको लागि ‘एसराई एण्ड एशोसियट्स’ लाई लेखापरीक्षकमा नियुक्त गर्नुका साथै सिभिल बैंक लिमिटेडलाई हिमालयन बैंक लिमिटेडले प्राप्ति (एक्विजिशन) गर्ने सन्दर्भमा सो बैंकको १०० कित्ता शेयर बराबर हिमालयन बैंक लिमिटेडको ८० दशमलव २८ कित्ता शेयर प्राप्त हुने गरी शेयर आदानप्रदान अनुपात (१००ः ८०.२८) कायम गरी प्राप्ती (एक्विजिशन) कार्यलाई अन्तिम स्वीकृति प्रदान गरेको छ ।
साथै सिभिल बैंक लिमिटेडलाई हिमालयन बैंक लिमिटेडले प्राप्ति (एक्विजिशन) गर्ने सम्बन्धमा भएको सम्पत्ती तथा दायित्वको मूल्याङ्कनकर्ताको नियुक्ति र निजलाई भुक्तानी गरिएको पारिश्रमिक, सम्पत्ति, दायित्व तथा कारोबारको मूल्याङ्कन प्रतिवेदन (ड्यू डेलिजेन्स अडिट रिपोर्ट), समझदारीपत्र, तथा अन्तिम सम्झौता पत्र लगायतका सम्पूर्ण काम कार्यबाहीहरुलाई अनुमोदन गरिएको छ ।
यसै प्रसंगमा सिभिल बैंकको प्राप्ति गर्ने प्रक्रियामा नेपाल राष्ट्र बैंक, कम्पनी रजिष्ट्रारको कार्यालय, धितोपत्र बोर्ड लगायतका नियमनकारी निकायहरुबाट स्वीकृति लिने/अभिलेख गर्ने क्रममा भए गरेका काम कारबाही वा पूँजी संरचना वा प्रबन्धपत्र नियमावलीको संशोधनको सम्बन्धमा नियमनकारी निकायहरुबाट संशोधन, परिमार्जन तथा थपघट गर्न कुनै निर्देशन प्राप्त भएमा प्राप्त निर्देशन बमोजिम मिलाई संशोधन वा परिमार्जन समेतका सम्पूर्ण कार्यहरु गर्न संचालक समितिलाई पूर्ण अख्तियारी प्रदान गरिएको बैंकले जानकारी दिएको छ ।
उक्त साधारण सभाका सबै प्रस्तावहरु पारित गरेको सभामा उपस्थित सबैलाई बैंकका अध्यक्ष प्रतापजङ्ग पाण्डेले धन्यवाद दिए । साथै सिभिल बैंकको मर्जर कमिटीलाई विशेष आभार प्रकट गर्दै नेपाल राष्ट्र बैंकको अन्तिम स्वीकृती पश्चात दुवै बैंकको एकीकृत कारोबार २०७९ माघभित्र गरिने योजना रहेको कुरा बैंकका अध्यक्ष प्रतापजङ्ग पाण्डेले बताए ।
करिब आठ लाखभन्दा बढी ग्राहकहरुलाई ११५ शाखाहरु, १३ एक्सटेन्सन काउन्टरहरु तथा १०२ एटिएम मार्पmत सेवा प्रदान गरिरहेको सिभिल बैंकले हालसम्म ९६ अर्ब भन्दा बढी निक्षेप परिचालन गरी ८६ अर्ब भन्दा बढी कर्जा लगानी गरिसकेको जानकारी दिएको छ ।
यो खबर पढेर तपाईलाई कस्तो महसुस भयो ?
प्रतिक्रिया