काठमाडौं । शहीद स्मारक ‘ए’ डिभिजन लिग फुटबल प्रतियोगिताअन्तर्गत छैटौँ चरणका खेल सकिँदासम्म दई वटा क्लब अझै पहिलो जितका लागि सङ्घर्षरत छन् ।
६ खेल खेलिसकेका मछिन्द्र क्लब र न्यूरोड टिम ‘एनआरटी’ अझै जितका लागि सङ्घर्ष गरिरहेका छन् । तर, रेलिगेशनबिनाको लिग हुनाले उनीहरूलाई केही राहत भने मिलेको छ ।
छैटौं चरणका खेल सकिँदासम्म मनाङ मस्र्याङ्दी क्लबले शत प्रतिशत नतिजासहित उपाधि होडमा बलियो दाबेदारी प्रस्तुत गरिरहेको छ । त्यस्तै मनाङ्लाई थ्री-स्टार क्लबले पच्छ्याइरहेको छ ।
गत असोज १३ गतेदेखि शुरु भएको लिगमा सहभागी १४ क्लबले ६/६ खेल खेलिसकेका छन् । कूल ९१ मध्ये छैटौं चरणसम्म आइपुग्दा ४२ खेल समाप्त भइसकेको छ । उपाधि दाबेदार क्लब मनाङ मस्र्याङ्दीले अहिलेसम्म सबै ६ खेल जितेको छ ।
मनाङसँगै अपराजित रहेको अर्को क्लब त्रिभुवन आर्मीले चार खेलमा जित र दुई बराबरी खेलेको छ । लिगमा यी दुई क्लबमात्र अहिलेसम्म अपराजित छन् ।
तयस्तै एक खेल मात्र हारेका थ्री-स्टार र सङ्कटा अङ्क तालिकामा आर्मी भन्दा अगाडि छन् । मनाङसँग आर्मी र थ्री स्टारलाई उपाधिको मुख्य दाबेदारको रुपमा हेरिएको छ । तर, आर्मीले दुई खेल बराबरी खेलेपछि शीर्ष स्थानको मनाङभन्दा चार अङ्कले पछि परेको छ ।
गोलको खोजीमा मछिन्द्र
लिगमा झण्डै आधा खेल खेलिसकेका दुई क्लब जितविहीन छन् । त्यसमा पनि एउटा क्लबले अहिलेसम्म गोल गर्न सकेको छैन । एनआरटी र मछिन्द्रले अहिलेसम्म जितको स्वाद पाएका छैनन् । मछिन्द्रले त गोल समेत गर्न सकेको छैन ।
६ खेल खेल्दा मछिन्द्रले तीन खेल बराबरी गरेको छ । तीनवटैमा मछिन्द्रले गोलरहित बराबरी खेल्यो । बाँकी तीन खेलमा मछिन्द्र पराजित भयो ।
लिगमा १४ ‘ए’ डिभिजन क्लबहरू थ्री स्टार, मनाङ मस्र्याङ्दी, नेपाल पुलिस, एपीएफ, आर्मी, जावलाखेल युथ क्लब, फ्रेन्ड्स क्लब, सङ्कटा, मछिन्द्र क्लब, सरस्वती युथ क्लब, च्यासल युथ क्लब, न्यूरोड टिम ‘एनआरटी’, ब्रिगेड ब्वाइज र हिमालयन शेर्पा क्लबले सहभागिता जनाएका छन् ।
राउण्ड रोविन लिगको आधारमा हुने प्रतियोगितामा कूल ९१ खेल हुनेछन् । लिगको विजेताले ५० लाख, उपविजेताले ३५ लाख र तेस्रो हुने २५ लाख पाउनेछन् । लिगको चौंथो टोलीले १५ लाख, पाँचौं टोलीले सात लाख र छैटौंले पाँच लाख पाउनेछन् । फेयर प्ले टिमले एक लाख पाउने छन् ।
प्रत्येक खेल जितेवापत एन्फाले क्लबलाई ५० हजार तथा म्यान अफ दि म्याच खेलाडीला १० हजार दिने छन् ।
त्यस्तै लिग विजेता टोलीले ‘एएफसी’ एशियन कप फुटबलमा सहभागिता जनाउन पाउने छन् । वि.स २०७१ पछि पुनः ‘ए’ डिभिजन लिग सञ्चालन भएको हो ।
यो खबर पढेर तपाईलाई कस्तो महसुस भयो ?
प्रतिक्रिया