माइकल ज्याक्सनको बायोपिक बन्दै, भतिज जाफर मुख्य भूमिकामा

काठमाडौं । स्वर्गीय पप गायक माइकल ज्याक्सनको जीवनमा आधारित फिल्म बन्ने भएको छ । माइकलको जीवनसँग आधारित यस फिल्ममा उनका भतिज जाफर ज्याक्सन मुख्य भूमिकामा देखिनेछन् ।

जीके स्टुडियोले सोमबार सामाजिक सञ्जालमा जाफरको फोटो अपलोड गर्दै बायोपिकको मुख्य अभिनेताको घोषणा गरेको हो । यो चलचित्रलाई एन्टोइन फुक्वाले निर्देशन गर्नेछन् भने चर्चित निर्माता ग्राहम किङले बायोपिक निर्माण गर्दैछन् । जाफर लामो समयदेखि माइकलको भूमिकाका लागि तयारी गरिरहेका छन् ।

जाफरले ६ महिनादेखि यो भूमिकाका लागि कडा तालिम लिइरहेका खबरहरु बाहिरिएका थिए ।

को हुन् जाफर ज्याक्सन ?

जाफर माइकल ज्याक्सनको जेठा भाइ जर्मेन ज्याक्सनका छोरा हुन्, जो पेशाले गायक र निर्माता हुन्। उनी लामो समयदेखि गायन र चलचित्र निर्माणमा सक्रिय छन् ।

मिडियासँग कुरा गर्दै माइकलकी आमा क्याथरिन ज्याक्सनले भनिन्– ‘जफर मेरो छोराको रूप हो । निर्माताहरूले उहाँलाई माइकलको रूपमा पर्दामा देख्नु वास्तवमै विशेष छ ।’

इन्स्टाग्राममा पोष्ट सेयर गर्दै जाफरले लेखेका छन्, ‘अङ्कल माइकलको कथालाई विश्वसामु ल्याउन पाउँदा मलाई धेरै खुशी र गर्व छ । म संसारका सबै फ्यानहरूलाई यो भन्न चाहन्छु कि हामी चाँडै भेट्नेछौं।’