दयाहाङ र दियालाई राखेर ‘दयारानी’ को पोस्टर, रिलिज मिति सार्वजनिक  (भिडियो)

काठमाडौं । गुरुङ चलचित्रमा लोकप्रिय निर्देशक माओत्से गुरुङले निर्देशन गरेको चलचित्र ‘दयारानी’ को पोस्टर सार्वजनिक गरिएको छ । निर्माण टिमले काठमाडौंमा एक कार्यक्रमको आयोजना गर्दै पोस्टर रिलिज गरेको हो ।

आउँदो वर्षको जेठ १० गतेलाई रिलिज मिति तोकेको यो फिल्ममा दयाहाङ राई, दिया पुन, विजय बराल लगायतका कलाकारको मुख्य भूमिका रहेको छ ।

माओत्से गुरुङको लेखन तथा निर्देशन रहेको यो फिल्म सिनेमा आर्टस् र माओत्से फिल्सको ब्यानरमा निर्माण भएको हो ।

सार्वजनिक गरिएको फस्ट लूकमा दिया पुन र दयाहाङ राईलाई प्रस्तुत गरिएको छ । गुरुङ समुदायमा दयारानी भन्नाले दयालु युवतीलाई बुझिन्छ । यसैका आधारमा फिल्मको नाम राखिएको निर्देशक गुरुङले बताए ।

चलचित्रले खराब श्रीमान र श्रीमतीको कथालाई उठान गरेको छ भने चलचित्रमा शैलेन्द्रध्वज कार्कीको छायांकन रहनेछ ।