स्पट फिक्सिङ : आदील र महबुबसहित ५ जनाविरुद्ध मुद्दा दर्ता

काठमाडौं । नेपाल टी-ट्वान्टी लिगमा स्पट फिक्सिङ गरेको भन्दै राष्ट्रिय टोलीका सदस्य आदील आलम र राष्ट्रिय टोलीका पूर्व खेलाडी महबुब आलमसहित ५ जनाविरुद्ध मुद्दा दर्ता भएको छ ।

सरकारी वकिल कार्यालय काठमाडौंले आदील र महबुबसहित ५ जनाविरुद्ध जिल्ला अदालत काठमाडौंमा मुद्दा दर्ता गरेको हो । सरकारी वकिल कार्यालयले आदील र महबुब, नितेश गुप्ता, नविन कँडेल र रवि माझीविरुद्ध मुद्दा दर्ता गरेको हो ।

केन्द्रीय अनुसन्धान ब्यूरो (सीआईबी) को अनुसन्धानको आधारमा उनीहरुविरुद्ध मुद्दा दर्ता गरिएको हो । नविन र रवि भने फरार प्रतिवादीको सूचीमा छन् ।

नेपाल टी-ट्वान्टी लिग पुस ९ गतेबाट २७ गतेसम्म टियु क्रिकेट मैदानमा आयोजना भएको थियो ।