‘ए’ डिभिजन लिगमा आज दुई खेल हुँदै

काठमाडौं । सहिद स्मारक ‘ए’ डिभिजन लिग फुटबल प्रतियोगितामा आज दुई खेलहरु हुँदैछन् । आज हुने दुई खेलमध्ये एक खेल च्यासल मैदान र एक खेल दशरथ रंगशालामा हुनेछ ।

च्यासलमा हुने खेलमा त्रिभुवन आर्मी क्लब र एपीएफ क्लब भिड्ने छन् । आर्मी र एपीएफबीचको खेल दिउँसो २:३० बजे शुरु हुनेछ । आर्मी आज दोस्रो जितको खोजीमा हुनेछ । आर्मी ३ खेलमा ५ अंक जोडेर छैटौं स्थानमा रहेको छ । एपीएफ पनि दोस्रो जितको खोजीमा हुनेछ । एपीएफ ३ खेलमा ४ अंक जोडेर नवौं स्थानमा रहेको छ ।

यस्तै, दोस्रो खेलमा न्युरोड टिम एनआरटी र मनाङ मर्स्याङ्दी क्लबबीच प्रतिस्पर्धा हुनेछ । एनआरटी र मनाङबीचको खेल साँझ ५:३० बजे शुरु हुनेछ ।एनआरटी पहिलो जित निकाल्ने दाउमा रहेको छ । एनआरटी ३ खेलमा १ अंक जोडेर १३ औं स्थानमा रहेको छ ।

मनाङ दोस्रो जितको खोजीमा हुनेछ । मनाङ ३ खेलमा ५ अंक जोडेर आठौं स्थानमा रहेको छ ।