घर भित्र इमरान खान, घर बाहिर प्रहरी र समर्थकबीच झडप (भिडियोसहित)

लोकपथ

२०७९,चैत्र,१,बुधबार १२:३८

काठमाडाैं । पाकिस्तानका पूर्वप्रधानमन्त्री इमरान खानको गिरफ्तारी पाकिस्तानी सरकारलाई निकै अफ्ट्यारो बनेको छ । मंगलबार साँझ पाकिस्तानी प्रहरीले इमरान खानलाई पक्राउ गर्न खोज्दा इमरानका समर्थक र प्रहरीबीच झडप भएको थियो । यद्यपि प्रहरीले इमरान खानलाई पक्राउ गर्न सकेको भने छैन ।

बुधबार बिहान ६ बजेदेखि इमरानका समर्थक र प्रहरीबीच फेरि झडप शुरु भएको छ । प्रहरीले इमरानका समर्थकमाथि अश्रुग्यास प्रहार गरिरहेको छ । यसै क्रममा इमरानका समर्थकले प्रहरीमाथि ढुंगा प्रहार गरिरहेका छन् ।

झडपमा धेरै घाइते :
इमरान खानको लाहोरस्थित घरलाई ठूलो संख्यामा प्रहरीले घेरा हालेको छ । इमरान खानविरुद्ध तोशाखाना मुद्दामा पक्राउ पुर्जी जारी गरिएको छ र धेरै प्रयास गर्दा पनि इस्लामाबाद पुलिसले इमरानलाई पक्राउ गर्न सकेको छैन। यही कारणले अहिले पाकिस्तानी प्रहरीले बल प्रयोग गरिरहेको छ । प्रहरी र इमरानका समर्थकबीच जारी झडपमा दुवै पक्षका धेरै मानिस घाइते भएको खबर बाहिरिएको छ ।