पहिलो हाफमा बंगलादेशविरुद्ध नेपाललाई अग्रता

काठमाडौं । साफ यू-१७ महिला च्याम्पियनसिप फुटबल प्रतियोगिताको चौंथो तथा आफ्नो अन्तिम खेलमा नेपालले आयोजक बंगलादेशविरुद्ध अग्रता बनाएको छ ।

ढाकास्थित बीएसएसएस मोस्ताफा कमल स्टेडियममा जारी खेलको पहिलो हाफमा नेपालले एक गोलको अग्रता बनाएको हो । नेपालका लागि सेनु परियारले आठौं मिनेटमा गोल गरिन् ।

नेपाल आज बंगलादेशलाई हराएर प्रतियोगिताको सुखद अन्त्य गर्न चाहन्छ । नेपालले अघिल्ला तीन खेलमा दुई हार र एक जित निकालेको छ । नेपाल पहिलो खेलमा भारत र तेस्रो खेलमा रसियासँग पराजित भएको थियो । नेपालले दोस्रो खेलमा भुटानलाई हराएको थियो ।

नेपाल ३ खेलमा ३ अंक जोडेर चौंथो स्थानमा रहेको छ । बंगलादेश ३ खेलमा ६ अंक जोडेर दोस्रो स्थानमा रहेको छ ।

रसिया ९ अंक जोडेर शीर्ष स्थानमा रहेको छ । भारत ६ अंक जोडेर तेस्रो स्थानमा रहेको छ । अंक विहीन भुटान पुछारमा रहेको छ ।